മുംബൈ : സാമ്പത്തികക്രമക്കേടില്‍ മുഖം നഷ്ടപ്പെട്ട് നില്‍ക്കുന്ന ഇന്‍ഡസ് ഇന്‍ഡ് ബാങ്കിനെ രക്ഷിക്കാന്‍ ആവുന്നതും ശ്രമിക്കുമെന്ന വാക്ക് പാലിച്ച് റിസര്‍വ്വ് ബാങ്ക് ഇന്‍ഡസ് ഇന്‍ഡ് ബാങ്കിന് പുതിയൊരു എംഡിയെ നല‍്കിയിരിക്കുകയാണ്. മൂന്ന് വര്‍ഷത്തേക്കാണ് റിസര്‍വ്വ് ബാങ്ക് ഈ നിയമനം നല്‍കിയിരിക്കുന്നത്. ബാങ്കിന്റെ സിഇഒയും ഇദ്ദേഹം തന്നെ.
എച്ച് ഡിഎഫ് സി ബാങ്കിന്റെ രാഹുല്‍ ശുക്ല, ബജാജ് ഫിനാന്‍സിന്റെ അനൂപ് സാഹ എന്നിവരും എംഡി കസേരയില്‍ ഇരിക്കാന്‍ പരിഗണിക്കപ്പെട്ടിരുന്നുവെങ്കിലും ഒടുവില്‍ നറുക്ക് വീണത് രാജീവ് ആനന്ദിനാണ്. നേരത്തെ ആക്സിസ് ബാങ്കില്‍ ഡപ്യൂട്ടി മാനേജിംഗ് ഡയറക്ടറായിരുന്നു 59 കാരനായ രാജീവ് ആനന്ദ്. 2009 മുതല്‍ ആക്സിസ് ബാങ്കിലുള്ള രാജീവ് ആനന്ദ് 2021ലാണ് ഡപ്യൂട്ടി എംഡിയായി ഉയര്‍ന്നത്.
രാജീവ് ആനന്ദിന്റെയും ടീമിന്റെയും പ്രവര്‍ത്തനങ്ങള്‍ ബാങ്കിന് മികച്ച വളര്‍ച്ച കൊണ്ടുവരുമെന്ന് പ്രതീക്ഷിക്കുന്നു. അതേ സമയം ദൈനംദിന ഭരണത്തില്‍ ബാങ്ക് ഉയര്‍ന്ന നിലവാരം ഈ ടീം ഉറപ്പാക്കുമെന്നും കരുതുന്നതായി ഇന്‍ഡസ് ഇന്‍ഡ് ബാങ്ക് ചെയര്‍മാന്‍ സുനില്‍ മേത്ത പറയുന്നു.
1979 കോടി രൂപയുടെ ആഭ്യന്തര അക്കൗണ്ടിംഗ് ക്രമക്കേടുകളുടെ ഉത്തരവാദിത്വം ഏറ്റെടുത്ത് ഇന്‍ഡസ് ഇന്‍ഡ് ബാങ്കിന്റെ സിഇഒ സുമന്ത് കത് പാലിയ രാജിവെച്ചൊഴിഞ്ഞതിനെ തുടര്‍ന്ന് വലിയ പ്രതിസന്ധിയിലായിരുന്നു ഇന്‍ഡസ് ഇന്‍ഡ് ബാങ്ക്.
സിഇഒ സുമന്ത് കത്പാലിയ ചെയ്തത് ഇന്‍സൈഡര്‍ ട്രേഡിംഗ് എന്ന ഗുരുതരമായ കുറ്റം
ബാങ്കില്‍ അക്കൗണ്ടിംഗില്‍ പൊരുത്തക്കേടുകള്‍ ഉണ്ടെന്നറിഞ്ഞിട്ടും അത് രഹസ്യമാക്കി വെച്ച് തങ്ങളുടെ കൈവശമുണ്ടായിരുന്ന ഓഹരികള്‍ വിറ്റ് ലാഭമുണ്ടാക്കുകയായിരുന്നു സിഇഒ സുമന്ത് കത് പാലിയയും ബാങ്കിന്റെ ഡപ്യൂട്ടി സിഇഒ ആയ അരുണ്‍ ഖുരാനയും. ഇന്‍ഡസ് ഇന്‍ഡ് ബാങ്കിന്റെ സിഇഒ ആയ സുമന്ത് കത്പാലിയ ബാങ്കിന്റെ ഓഹരിവില 1437 രൂപ ആയിരുന്നപ്പോള്‍ അദ്ദേഹത്തിന്റെ ഉടമസ്ഥതയിലുള്ള ഇന്‍ഡസ് ഇന്‍ഡ് ബാങ്കിന്റെ ഓഹരികള്‍ വിറ്റഴിച്ച് 118 കോടി സമാഹരിച്ചിരുന്നു. അതുപോലെ ബാങ്കിന്റെ ഡപ്യൂട്ടി സിഇഒ ആയ അരുണ്‍ ഖുരാന ഇന്‍ഡസ് ഇന്‍ഡ് ബാങ്കിന്റെ ഓഹരി വില 1451 രൂപയില്‍ നില്‍ക്കുമ്പോള്‍ തന്റെ പക്കലുള്ള ഓഹരികള്‍ വിറ്റ് 70 കോടി സമാഹരിച്ചിരുന്നു. ബാങ്കിന്റെ അക്കൗണ്ടിംഗില്‍ 1979 കോടി രൂപയുടെ പൊരുത്തക്കേടുകള്‍ ഉണ്ടെന്ന് സിഇഒയ്‌ക്കും ഡപ്യൂട്ടി സിഇഒയ്‌ക്കും അറിയാമായിരുന്നു. ഇത് പുറത്തറിഞ്ഞാല്‍ വലിയ ബഹളം ഉണ്ടാകുമെന്നറിയാവുന്നതിനാല്‍ അവര്‍ അത് രഹസ്യമാക്കിവെച്ചു. പിന്നീട് തങ്ങളുടെ പക്കല്‍ ഉണ്ടായിരുന്ന ഓഹരികള്‍ ഇവര്‍ രണ്ടു പേരും വിറ്റ് കാശാക്കുകയായിരുന്നു എന്ന ഗുരുതരമായ കുറ്റം ഇവരുടെ ഭാഗത്ത് കണ്ടെത്തിയിട്ടുണ്ട്. ബാങ്കില്‍ അക്കൗണ്ടിംഗില്‍ പൊരുത്തക്കേടുകള്‍ ഉണ്ടെന്നറിഞ്ഞിട്ടും അത് രഹസ്യമാക്കി വെച്ച് തങ്ങളുടെ കൈവശമുണ്ടായിരുന്ന ഓഹരികള്‍ വിറ്റ് ലാഭമുണ്ടാക്കുന്നതിനെയാണ് ഇന്‍സൈഡര്‍ ട്രേഡിംഗ് എന്ന് വിളിക്കുന്നത്. ഇത് ഗുരുതരമായ സാമ്പത്തിക കുറ്റകൃത്യമാണ്.
