തിരുവനന്തപുരം: നിത്യഹരിത നായകന് പ്രേംനസീറിന്റെയും ഹബീബ ബീവിയുടെയും മകനും നടനുമായ വഴുതക്കാട് ആകാശവാണിക്കു സമീപത്തെ കോര്ഡോണ് ട്രിനിറ്റി 2 ബിയില് ഷാനവാസ് (70) അന്തരിച്ചു. തിങ്കളാഴ്ച രാത്രി 11.50ന് തിരുവനന്തപുരത്തെ സ്വകാര്യ ആശുപത്രിയിലായിരുന്നു അന്ത്യം. വൃക്കയ്ക്കും ഹൃദയത്തിനുമുള്ള രോഗങ്ങളെ തുടര്ന്ന് നാലുവര്ഷമായി ചികിത്സയിലായിരുന്നു. തിങ്കളാഴ്ച രാത്രിയോടെ രോഗം മൂര്ച്ഛിച്ചതിനെ തുടര്ന്ന് തിരുവനന്തപുരത്തെ സ്വകാര്യ ആശുപത്രിയില് എത്തിച്ചെങ്കിലും മരണത്തിനു കീഴടങ്ങി.
ഇന്നലെ രാവിലെ 10ന് വഴുതക്കാട്ടുള്ള വീട്ടില് മന്ത്രി സജി ചെറിയാന് ഉള്പ്പെടെ ജനപ്രതിനിധികളും ചലച്ചിത്ര അക്കാദമി ചെയര്മാന് പ്രേംകുമാര്, കെഎസ്എഫ്ഡിസി ചെയര്മാന് കെ. മധു, താരങ്ങളായ മണിയന്പിള്ള രാജു, ജോസ് കുര്യന്, കാര്ത്തിക, ജലജ, നന്ദു, ഭീമന് രഘു, അപ്പാ ഹാജി, അരിസ്റ്റോ സുരേഷ്, കുക്കു പരമേശ്വരന്, മധുപാല്,ബാലാജി ശര്മ, പ്രഫ. അലിയാര് തുടങ്ങിയവര് അന്ത്യോപചാരമര്പ്പിച്ചു. വൈകുന്നേരത്തോടെ വിലാപയാത്രയായി പാളയം ജുമാമസ്ജിദില് എത്തിച്ചു. ഇവിടെ ശ്രീകുമാരന് തമ്പി, നടന് ദേവന് തുടങ്ങിയവര് ഷാനവാസിന് അന്തിമോപചാരമര്പ്പിക്കാന് എത്തി. തുടര്ന്ന് പാളയം ഇമാം ഡോ. വി.പി. സുഹൈബ് മൗലവിയുടെ കാര്മികത്വത്തില് കബറടക്കം നടത്തി.
ഭാര്യ: അയിഷ അബ്ദുല് അസീസ്. മക്കള്: അജിത് ഖാന്, ഷമീര്ഖാന്. മരുമകള്: ഹന.
ചിറയിന്കീഴ് ഇംഗ്ലിഷ് മീഡിയം സ്കൂള്, മോണ്ട്ഫോര്ട്ട് സ്കൂള്, യേര്ക്കാട് എന്നിവിടങ്ങളില് നിന്ന് പ്രാഥമിക വിദ്യാഭ്യാസം പൂര്ത്തിയാക്കി. ചെന്നൈ ന്യൂ കോളജില്നിന്ന് ഇംഗ്ലിഷ് സാഹിത്യത്തില് മാസ്റ്റേഴ്സ് ബിരുദവും നേടി. 1981 ല് ബാലചന്ദ്രമേനോന് സംവിധാനം ചെയ്ത പ്രേമഗീതങ്ങള് എന്ന ചിത്രത്തിലൂടെയാണ് ഷാനവാസ് സിനിമയിലേക്കെത്തിയത്.
ഇവന് ഒരു സിംഹം എന്ന സിനിമയില് ആദ്യമായി നസീറിനൊപ്പം അഭിനയിച്ചു. തുടര്ന്ന് ഏഴ് സിനിമകളില് അച്ഛനും മകനും ഒന്നിച്ചഭിനയിച്ചു. ഷാനവാസ് മലയാളം, തമിഴ് ഭാഷകളിലായി അന്പതിലേറെ സിനിമകളില് അഭിനയിച്ചിട്ടുണ്ട്.
മഴനിലാവ്, ഈയുഗം, മണിയറ, നീലഗിരി, ഗര്ഭശ്രീമാന്, മണിത്താലി, ഗാനം, ഹിമം, ചിത്രം, സക്കറിയയുടെ ഗര്ഭിണികള് തുടങ്ങിയ
ഒട്ടേറെ ചിത്രങ്ങളില് വേഷമിട്ടു. തുടര്ന്ന് സിനിമാരംഗം ഉപേക്ഷിച്ച് ദുബായില് ഷിപ്പിങ് കമ്പനിയില് മാനേജരായി. 10 വര്ഷത്തോളം നീണ്ട ഔദ്യോഗിക ജീവിതത്തിനു ശേഷം മടങ്ങിയെത്തി സീരിയലുകളിലും സിനിമകളിലും വീണ്ടും സജീവമായി.
2011 ല് ചൈനാ ടൗണ് എന്ന ചിത്രത്തിലൂടെയാണ് സിനിമയിലേക്ക് മടങ്ങിയെത്തിയത്. ജനഗണമനയാണ് അവസാന ചിത്രം. ശംഖുമുഖം, വെളുത്ത കത്രീന, കടമറ്റത്തു കത്തനാര്, സത്യമേവ ജയതേ തുടങ്ങിയ സീരിയലുകളിലും വേഷമിട്ടു.
