കൊച്ചി: ബംഗാള് ഉള്ക്കടലില് തമിഴ്നാടിന്റെ തെക്കന് മേഖലയോട് ചേര്ന്ന് അന്തരീക്ഷച്ചുഴി രൂപപ്പെട്ടതിനെ തുടര്ന്ന് സംസ്ഥാനത്ത് മഴ കനത്തു.
രണ്ട് ദിവസമായി തുടരുന്ന മഴ ഇന്നലെ പുലര്ച്ചെ മുതല് മധ്യ കേരളത്തില് വ്യാപകമായി ലഭിച്ചു. മണിക്കൂറുകള് നീണ്ടുനിന്ന മഴയില് നാടും നഗരവും വെള്ളത്തിലായി. എറണാകുളം, തൃശൂര് ജില്ലകളുടെ താഴ്ന്ന പ്രദേശങ്ങള് വെള്ളത്തിലായത് ജനജീവിതം ദുസ്സഹമാക്കി. ഇടുക്കി, കോട്ടയം ജില്ലകളിലും കനത്ത മഴയാണ് ലഭിച്ചത്. നിരവധിയിടങ്ങളില് റോഡില് വെള്ളക്കെട്ട് രൂപപ്പെട്ടതോടെ ഗതാഗതം സ്തംഭിച്ചു. പലയിടത്തും വാഹനങ്ങള് വെള്ളത്തിലകപ്പെട്ട് ഓട്ടം നിലച്ചു.
എറണാകുളം ജില്ലയിലെ പിറവത്ത് അതിതീവ്രമഴയും രേഖപ്പെടുത്തി. 22 സെ.മീ. മഴയാണ് ഇവിടെ ലഭിച്ചത്.
ഇന്ന് കണ്ണൂര്, കാസര്കോട് ജില്ലകളില് റെഡ് അലര്ട്ടാണ്. മലപ്പുറം, കോഴിക്കോട്, വയനാട് ജില്ലകളില് ഓറഞ്ചും. എറണാകുളം, ഇടുക്കി, തൃശൂര്, പാലക്കാട് ജില്ലകളില് യെല്ലോയും.
രണ്ട് ദിവസം കൂടി വടക്കന് ജില്ലകളില് ഒറ്റപ്പെട്ടയിടങ്ങളില് മഴ സാധ്യതയുണ്ട്. മറ്റിടങ്ങളില് ഇന്ന് മുതല് മഴയുടെ ശക്തി കുറയും. കടലില് ശക്തമായ കാറ്റിന് സാധ്യതയുള്ളതിനാല് ഇന്ന് അര്ധരാത്രി വരെ കേരള തീരത്ത് നിന്ന് മത്സ്യബന്ധനത്തിന് പോകുന്നതിന് നിരോധനമുണ്ട്.
