നെയ്യാറ്റിന്കര: നൂറുല് ഇസ്ലാം എഡ്യൂക്കേഷണല് ട്രസ്റ്റും നിംസ് മെഡിസിറ്റിയും ഏര്പ്പെടുത്തിയ ഏഴാമത് എപിജെ അവാര്ഡ് ദാന ചടങ്ങ് ഗവര്ണര് രാജേന്ദ്ര വിശ്വനാഥ് ആര്ലേക്കര് ഉദ്ഘാടനം ചെയ്തു. വികസിത ഭാരതമെന്ന സ്വപ്നത്തിലേക്ക് നിംസിന്റെ സംഭാവന വിലമതിക്കാനാകാത്തതാണെന്നും നാമോരോരുത്തരും ഒറ്റകെട്ടായി പ്രവര്ത്തിച്ചാല് വികസിത ഭാരത സങ്കല്പ്പം പ്രാവര്ത്തികമാക്കാമെന്നും ഗവര്ണര് പറഞ്ഞു.
എപിജെ അവാര്ഡ് ഐഎസ്ആര്ഒ ചെയര്മാന് ഡോ. വി. നാരായണന് സമര്പ്പിച്ചു. ഒരു ലക്ഷം രൂപയും ഫലകവും പ്രശസ്തി പത്രവുമടങ്ങുന്നതാണ് പുരസ്കാരം.
കെ.ആന്സലന് എംഎല്എ അധ്യക്ഷനായി. നിംസ് മെഡിസിറ്റി എംഡിയും നൂറുല് ഇസ്ലാം സര്വകലാശാല പ്രോ ചാന്സലറുമായ എം.എസ്. ഫൈസല് ഖാന് ആമുഖ പ്രഭാഷണം നടത്തി. വൈസ് ചാന്സലര് ഡോ. ടെസ്സി തോമസ് മുഖ്യ പ്രഭാഷണം നടത്തി. ചാന്സലര് ഡോ. മജീദ് ഖാന് ഗവര്ണര്ക്ക് ആദരവ് നല്കി. നൂറുല് ഇസ്ലാം എഡ്യൂക്കേഷണല് ട്രസ്റ്റ് എക്സിക്യൂട്ടീവ് ഡയറക്ടര് ഷബ്നം ഷഫീക്ക്, മുന് മന്ത്രി പന്തളം സുധാകരന് തുടങ്ങിയവര് പങ്കെടുത്തു.പതിനെട്ട് വയസ്സിന് താഴെ പ്രായമുള്ള ഭിന്നശേഷി കുട്ടികള്ക്ക് നിംസ് നടത്തിവരുന്ന പെന്ഷന് പദ്ധതിയില് കാഞ്ഞിരംകുളം ഗ്രാമ പഞ്ചായത്തിനെയും, പൂന്തുറ വാര്ഡിനെയും ഉള്പ്പെടുത്തി. മുന് രാഷ്ട്രപതി ഡോ. എപിജെ അബ്ദുള് കലാമുമായി പഠനകാലത്ത് വീഡിയോ കോണ്ഫറന്സ് വഴി ആശയ വിനിമയം നടത്തിയ നൂറുല് ഇസ്ലാം സര്വകലാശാല പൂര്വ്വ വിദ്യാര്ത്ഥിനി ആശ എന്.എസിനെ ആദരിച്ചു.
