ന്യൂദല്ഹി: ഭാരതം ഫിലിപ്പീന്സിന്റെ ഏറ്റവും വിലപ്പെട്ട സുഹൃത്താണെന്ന് ന്യൂദല്ഹിയിലെത്തിയ ഫിലിപ്പീന്സ് പ്രസിഡന്റ് ഫെര്ഡിനാന്ഡ് ആര്. മാര്ക്കോസ് ജൂനിയര്. അഞ്ചു ദിവസത്തെ സന്ദര്ശനത്തിനാണ് ഫെര്ഡിനാന്ഡ് ആര്. മാര്ക്കോസ് ജൂനിയര് എത്തിയത്.
2022ല് അധികാരമേറ്റതിനു ശേഷമുള്ള ആദ്യ സന്ദര്ശനമാണിത്.
ഭാരതവുമായുള്ള ഉഭയകക്ഷി ബന്ധം കൂടുതല് വിശാലമാക്കുക എന്ന ലക്ഷ്യത്തോടെയാണ് ഈ സന്ദര്ശനമെന്ന് അദ്ദേഹം സൂചിപ്പിച്ചു. ഫിലിപ്പീന് ജനതയ്ക്ക് താങ്ങാനാകുന്ന വിലയ്ക്ക് മരുന്ന്, ഡിജിറ്റല് കണക്ടിവിറ്റി, മെച്ചപ്പെട്ട ഭക്ഷ്യസുരക്ഷ എന്നിവയുള്പ്പടെയുള്ള നേട്ടങ്ങള് ലഭ്യമാക്കാന് ഭാരതവുമായി എല്ലാ സഹകരണങ്ങളും മെച്ചപ്പെടുത്തുമെന്നും അദ്ദേഹം പറഞ്ഞു. ഭാരതവും ഫിലിപ്പീന്സും തമ്മിലുള്ള നയതന്ത്ര ബന്ധത്തിന്റെ 75-ാം വാര്ഷികത്തോടനുബന്ധിച്ചാണ് സന്ദര്ശനം.
ന്യൂദല്ഹിയില് അദ്ദേഹം പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച്ച നടത്തും. ഭാരതത്തിന്റെ ആക്ട് ഈസ്റ്റ് പോളിസി, ഇന്തോ-പസഫിക് തന്ത്രം, വിഷന് മഹാസാഗര് എന്നിവയില് പ്രധാന പങ്കാളിയാണ് ഫിലിപ്പീന്സ് എന്ന് വിദേശകാര്യ മന്ത്രാലയം എക്സിലൂടെ അറിയിച്ചു.
