തിരുവനന്തപുരം: നഗരത്തില്‍ തെരുവ് കച്ചവടക്കാര്‍ ലൈസന്‍സ് നല്‍കാമെന്ന് പറഞ്ഞ് നഗരസഭാ ഉദ്യോഗസ്ഥര്‍ വ്യാപകമായി പണപ്പിരിവ് നടത്തുന്നു. കുഞ്ചാലുംമൂട് പൂജപ്പുര റോഡില്‍ വര്‍ഷങ്ങളായി വഴിയോരക്കച്ചവടം നടത്തുന്നവരെ ഭീഷണിപ്പെടുത്തിയാണ് പണപ്പിരിവ് നടത്തുന്നത്. 4500 മുതല്‍ 12000 രൂപവരെയാണ് ഈടാക്കുന്നത്. \
ഒന്‍പത് വര്‍ഷമായി പുജപ്പുരയില്‍ വഴിയോരക്കച്ചവടം നടത്തുന്ന വിധവയില്‍ നിന്ന് 9000 രൂപയാണ് ലൈസന്‍സ് ഫീസായി ഈടാക്കിയത്. വര്‍ഷങ്ങളായി കരിക്ക് കച്ചവടം നടത്തുന്ന ആളിനോട് 4500 രൂപയാണ് ലൈസന്‍സ് ഫീസായി ചോദിച്ചത്. ലൈസന്‍സ് ഫീസിന് എന്താണ് മാനദണ്ഡമെന്ന് ആര്‍ക്കുമറിയില്ല. ഒരു വര്‍ഷത്തേക്കാണ് 9000 രൂപ. 10 വര്‍ഷത്തോളമായി പൂജപ്പുരയില്‍ വഴിയോരക്കച്ചവടം ചെയ്യുന്നവര്‍ക്ക് ഈ ഭീമമായ ഫീസ് താങ്ങാനാവുന്നതല്ലെന്ന് അവര്‍ പറഞ്ഞു.
മുന്‍പ് കച്ചവടം ഉണ്ടായിരുന്നു. ഇപ്പോള്‍ കച്ചവടം വളരെ കുറവാണ്. വര്‍ഷം 12000 രൂപ വരെ ലൈസന്‍സ് ഫീസായി കോര്‍പ്പറേഷന് നല്‍കണമെന്ന് പറയുന്നത് കുടുംബം പുലര്‍ത്താന്‍ വെയിലും മഴയും കൊണ്ട് തെരുവോരത്ത് കച്ചവടം ചെയ്യുന്ന സാധാരണക്കാര്‍ക്ക് തിരിച്ചടിയായിരിക്കുകയാണ്. ലൈസന്‍സ് എടുത്തില്ലെങ്കില്‍ കച്ചവടം ചെയ്യാന്‍ സമ്മതിക്കില്ലെന്ന് ഭീഷണിപ്പെടുത്തിയാണ് പണം വാങ്ങുന്നത്.
സിഐടിയു നേതൃത്വത്തിലുള്ള വഴിയോരകച്ചവട തൊഴിലാളി ഫെഡറേഷനില്‍ അംഗത്വമെടുക്കണമെന്ന് ഭീഷണിപ്പെടുത്തുന്നതും പതിവാണെന്ന് കച്ചവടക്കാര്‍ പറയുന്നു. അംഗത്വമെടുത്തില്ലെങ്കിലും പാര്‍ട്ടിയുടെയും സിഐടിയുവിന്റെയും എല്ലാ പിരിവുകളും നിര്‍ബന്ധപൂര്‍വം അടിച്ചേല്‍പ്പിക്കുന്നു. പൊതുയോഗങ്ങള്‍ക്കും മറ്റ് പരിപാടികള്‍ക്കും നിര്‍ബന്ധിച്ച് പങ്കെടുപ്പിക്കുന്നു. സംഭാവന നല്‍കാത്തവരെയും പരിപാടികള്‍ക്ക് പങ്കെടുക്കാത്തവരെയും ദ്രോഹിക്കുന്നതായും കച്ചവടക്കാര്‍ പറയുന്നു.
തണല്‍മരങ്ങള്‍ക്ക് കീഴിലിരുന്ന് കച്ചവടം ചെയ്യുന്നവരെ മരം മുറിച്ചും തട്ടിന് സമീപം പട്ടികളുടെ ശരീരം മറവ് ചെയ്തും പരമാവധി ഉപദ്രവിക്കുകയും ചെയ്യുന്നു. പ്രദേശത്ത് മത്സ്യം കച്ചവടം ചെയ്യുന്നവരുമുണ്ട്. അവരെയൊന്നും ഇത് വരെ നഗരസഭാ അധികൃതര്‍ സമീപിച്ചിട്ടില്ല.
