തിരുവനന്തപുരം: തദ്ദേശ സ്വയംഭരണ സ്ഥാപനങ്ങളിലേക്ക് നടക്കാനിരിക്കുന്ന തെരഞ്ഞെടുപ്പിന്റെ തയാറെടുപ്പുകള് പൂര്ണമായും അട്ടിമറിക്കപ്പെട്ട സ്ഥിതിയാണെന്ന് ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര്. തിരുവനന്തപുരം അടക്കം നിരവധി നഗരസഭകളിലും ബഹുഭൂരിപക്ഷം പഞ്ചായത്തുകളിലും വാര്ഡ് വിഭജനത്തിലും വോട്ടര് പട്ടികയിലും ഗുരുതര ക്രമക്കേടുകളുണ്ട്.
നൂറുകണക്കിന് പരാതികള് ഇതിനകം ലഭിച്ചിട്ടും അവയൊന്നും കാര്യമായി പരിഗണിക്കാന് തെരഞ്ഞെടുപ്പ് കമ്മീഷന് തയാറായിട്ടില്ല. സര്വകക്ഷി യോഗത്തില് ഉള്പ്പെടെ ബിജെപി പരാതികള് ഉന്നയിച്ചിട്ടും പരിഹാരം ഉണ്ടായില്ല. കോടതികളെ സമീപിക്കുകയല്ലാതെ മറ്റ് വഴികള് ഇല്ലെന്ന സ്ഥിതിയാണെന്ന് ബിജെപി സംസ്ഥാന അധ്യക്ഷന് പറഞ്ഞു.
വാര്ഡ് വിഭജനത്തില് ഗുരുതര പ്രശ്നങ്ങളാണ് ഉണ്ടായിട്ടുള്ളത്. ഡീലിമിറ്റേഷന് സംബന്ധിച്ച പരാതികള് പരിഗണിക്കാതെ നടത്തിയ വാര്ഡ് വിഭജനം തെരഞ്ഞെടുപ്പിനെ അട്ടിമറിക്കുന്ന രീതിയിലേക്കാണ് എത്തിച്ചേര്ന്നിട്ടുളളത്. തെളിവുകള് സഹിതമുള്ള നൂറുകണക്കിന് പരാതികള് ലഭിച്ചിട്ടും ഡീലിമിറ്റേഷന് കമ്മീഷന് അവയില് എന്ത് നടപടി സ്വീകരിച്ചുവെന്ന് വ്യക്തമാക്കണം. സിപി എം താല്പര്യത്തിന് വഴങ്ങി തെരഞ്ഞെടുപ്പ് കമ്മീഷനിലെ ഉദ്യോഗസ്ഥര് പ്രവര്ത്തിക്കുന്നുവെന്ന് സംശയിക്കേണ്ടിയിരിക്കുന്നുവെന്ന് രാജീവ് ചന്ദ്രശേഖര് ആരോപിച്ചു.
പരാതികള് പരിഗണിക്കാതെ നടത്തിയ അതിര്ത്തി പുനര്നിര്ണയം അപാകതകള് ഒരുപാട് നിറഞ്ഞതാണ്. പല വാര്ഡുകളിലെയും അതിര്ത്തിക്കുള്ളില് നിശ്ചയിച്ച വീടുകള്ക്ക് പുറമെ 500 വോട്ടുകള് വരെ മാറ്റിച്ചേര്ക്കപ്പെട്ടിട്ടുണ്ട്. വാര്ഡ് പരിധിക്ക് ഉള്ളിലല്ലാത്ത വീടുകള് പോലും വോട്ടര് പട്ടികയില് ഉള്പ്പെടുത്തുന്നത് എല്ഡിഎഫിന് വേണ്ടി തെരഞ്ഞെടുപ്പ് നടപടികള് അട്ടിമറിക്കുന്നതിന്റെ ഭാഗമാണ്. ഒരേ വീടിന്റെ പേരിലും നമ്പറിലും നിരവധി വീടുകളാണ് പട്ടികയില് ഉള്പ്പെടുത്തിയിരിക്കുന്നതെന്നും രാജീവ് ചന്ദ്രശേഖര് കുറ്റപ്പെടുത്തി.
ധാരാളം അടിസ്ഥാന പ്രശ്നങ്ങളും ക്ലറിക്കല് മിസ്റ്റേക്കുകളും നിറഞ്ഞതാണ് വോട്ടര് പട്ടിക. തെരഞ്ഞെടുപ്പ് നടപടിക്രമങ്ങളുടെ അടിസ്ഥാന രേഖയായ വോട്ടര് പട്ടികക്ക് യാതൊരു വിലയും നല്കാതെയുള്ള തെരഞ്ഞെടുപ്പ് കമ്മീഷനിലെ ഉദ്യോഗസ്ഥരുടെ പെരുമാറ്റം എല്ഡിഎഫിന് വേണ്ടി ജനഹിതം അട്ടിമറിക്കാന് ആണെന്ന് സംശയമുണ്ട്. അറിഞ്ഞോ അറിയാതെയോ ഈ പ്രവര്ത്തനങ്ങള്ക്ക് കൂട്ടുനില്ക്കുന്ന ഉദ്യോഗസ്ഥര് ജനാധിപത്യ പ്രക്രിയയില് തെരഞ്ഞെടുപ്പ് സുതാര്യമായി നടക്കാനുള്ള നടപടിക്രമങ്ങള് സ്വീകരിച്ച് പരാതികള് പരിഹരിക്കാന് എത്രയും വേഗം നടപടികള് സ്വീകരിക്കണം.ഇല്ലെങ്കില് പ്രക്ഷോഭങ്ങളിലേക്കും നിയമ നടപടികളിലേക്കും കടക്കേണ്ടി വരുമെന്ന് രാജീവ് ചന്ദ്രശേഖര്വ്യക്തമാക്കി.
