കണ്ണൂര്: കൊടുംകുറ്റവാളി ചാർളി തോമസ് എന്ന ഗോവിന്ദച്ചാമി ജയില്ചാടിയ സംഭവത്തില് അസിസ്റ്റന്റ് പ്രിസണ് ഓഫീസര് ഉൾപ്പടെ നാല് പോലീസ് ഉദ്യോഗസ്ഥര്ക്ക് സസ്പെന്ഷന്. വ്യാഴാഴ്ച രാത്രി ജയില് ഡ്യൂട്ടിയിലുണ്ടായിരുന്ന ഉദ്യോഗസ്ഥര്ക്കെതിരെയാണ് നടപടി. പ്രാഥമിക വിവരത്തിന്റെ അടിസ്ഥാനത്തിലാണ് സസ്പെന്ഷന്.
പുലര്ച്ചെ 1:15നാണ് ഗോവിന്ദച്ചാമി ജയില്ചാടിയത്. ആറരയോടെയാണ് ഗോവിന്ദച്ചാമി ജയില് ചാടിയ വിവരം പോലീസിന് ലഭിച്ചതെന്ന് കണ്ണൂര് സിറ്റി പൊലീസ് കമ്മീഷണര് നിതിന് രാജ് പറഞ്ഞു. ഗോവിന്ദച്ചാമിയെ പിടികൂടുമ്പോള് കൈവശം ചെറിയ ആയുധങ്ങള് ഉണ്ടായിരുന്നു. ഏത് രീതിയിലാണ് ആയുധങ്ങള് ഉപയോഗപ്പെടുത്തിയതെന്ന് വിശദമായ അന്വേഷണത്തിന് ശേഷമേ വ്യക്തമാരൂവെന്ന് നിതിൻ രാജ് പ്രതികരിച്ചു.
തളാപ്പിലെ കാടുപിടിച്ച് ഉപേക്ഷിക്കപ്പെട്ടിരുന്ന കെട്ടിടത്തിന് സമീപത്തുണ്ടായിരുന്ന കിണറ്റിനുള്ളില്നിന്നാണ് ഗോവിന്ദച്ചാമി പിടിയിലായത്. ഇവിടെ ഇയാള് ഒളിച്ചിരിപ്പുണ്ടെന്ന വിവരത്തെ തുടര്ന്നാണ് പോലീസ് ഇവിടെയെത്തിയത്. ഗോവിന്ദച്ചാമിയെ കണ്ട് സംശയം തോന്നിയ നാട്ടുകാരില് ചിലരാണ് പോലീസില് വിവരം അറിയിച്ചത്.
അതീവ സുരക്ഷാ സജ്ജീകരണങ്ങളുള്ള ജയിലില് സെല്ലിലെ അഴികള് മുറിച്ചാണ് ഇയാള് പുറത്ത് കടന്നത്. അലക്കാന് വെച്ചിരുന്ന തുണികള് കൂട്ടിക്കെട്ടി കയര് പോലെയാക്കി. പിന്നീട് മതിലിന് മുകളിലുള്ള ഫെന്സിംഗില് തുണികുരുകി. അതേ തുണി ഉപയോഗിച്ച് ഇയാള് മതിലില് നിന്ന് താഴേക്കിറങ്ങുകയായിരുന്നു. ജയില് ചാടാനായി 20 ദിവസങ്ങളോളം തയാറെടുപ്പ് നടത്തിയിരുന്നു. ജയില് ചാടാനായി ആരുടെയെങ്കിലും സഹായം ലഭിച്ചോ എന്ന് പരിശോധിക്കും.
പലകോണില് നിന്നും നാട്ടുകാരടക്കം വിവരം നല്കിയിരുന്നു.ഇതെല്ലാം പൊലീസ് പരിശോധിച്ചിരുന്നു. ഗോവിന്ദച്ചാമിയെക്കുറിച്ച് കൃത്യമായ വിവരം തന്നെ മൂന്ന് നാല് പേരുണ്ട്.അവരെയും പോലീസ് അഭിനന്ദിക്കുന്നെന്നും അദ്ദേഹം കൂട്ടിച്ചേര്ത്തു.
