പസഫിക് സമുദ്രത്തിലേക്ക് കോടിക്കണക്കിന് ഗാലൺ മലിനജലവും രാസവസ്തുക്കളും ഒഴുകുന്നു : ടിജുവാന നദിയുടെ കാര്യത്തിൽ അമേരിക്ക-മെക്സിക്കോ കരാർ പ്രാബല്യത്തിൽ

സാൻ ഡീഗോ: മാലിന്യക്കടൽ എന്നറിയപ്പെടുന്ന ടിജുവാന നദിയുമായി ബന്ധപ്പെട്ട് യുഎസും മെക്സിക്കോയും ഒരു പ്രധാന കരാറിലെത്തി. ടിജുവാനയിലെ മലിനജലം യുഎസ് അതിർത്തിയിലേക്ക് ഒഴുകുകയും കാലിഫോർണിയയിലെ ബീച്ചുകൾ മലിനമാക്കുകയും ചെയ്യുന്നതിന്റെ പഴക്കമുള്ള പ്രശ്നം കൈകാര്യം ചെയ്യുന്നതിനാണ് ഇരു രാജ്യങ്ങളും ഇപ്പോൾ ഈ കരാറിലെത്തിയത്.

ടിജുവാന നദിയിൽ നിന്ന് കോടിക്കണക്കിന് ഗാലൺ മലിന ജലവും വിഷ രാസവസ്തുക്കളും പസഫിക് സമുദ്രത്തിലേക്ക് ഒഴുകുന്നുണ്ട്. ഇതുമൂലം തെക്കൻ കാലിഫോർണിയയിലെ ബീച്ചുകൾ അടച്ചുപൂട്ടേണ്ടിവന്നു. കൂടാതെ അവിടെ പരിശീലനം നടത്തുന്ന നേവി സീലുകളും രോഗബാധിതരായി. എന്നാൽ ഇപ്പോൾ ഈ പ്രശ്നം പരിഹരിക്കുന്നതിന് ഒരു സമയപരിധി നിശ്ചയിച്ചിട്ടുണ്ട്.

ഈ പ്രശ്നം കുറെ വർഷങ്ങളായി തുടരുകയാണ്. ട്രംപ് ഭരണകൂടത്തിന്റെ ഒന്നാം ഘട്ട കാലത്ത് ഇത് പരിഹരിക്കാൻ നിരവധി ശ്രമങ്ങളും ദശലക്ഷക്കണക്കിന് ഡോളറുകളും ചെലവഴിച്ചെങ്കിലും ഇപ്പോഴും ഒരു പരിഹാരവും കണ്ടെത്തിയില്ല.

അതേ സമയം ഈ പ്രശ്നത്തിൽ ഇരു രാജ്യങ്ങളും തമ്മിലുള്ള സഹകരണം ശക്തിപ്പെടുത്താനുള്ള പ്രതിബദ്ധത വളരെ ആഴത്തിലുള്ളതാണെന്ന് മെക്സിക്കോയുടെ പരിസ്ഥിതി മന്ത്രി അലീഷ്യ ബാർസീന പറഞ്ഞു. മെക്സിക്കോ സിറ്റിയിൽ യുഎസ് പരിസ്ഥിതി സംരക്ഷണ ഏജൻസി (ഇപിഎ) മേധാവി ലീ സെൽഡിനുമായി ഒരു ധാരണാപത്രത്തിൽ ഒപ്പുവച്ചതിന് ശേഷം അവർ ഇത്തരത്തിൽ പ്രതികരിച്ചത്. ഈ കരാറിന് മൂന്ന് മാസം മുമ്പ് സെൽഡിൻ സാൻ ഡീഗോയിലേക്ക് പോയിരുന്നു. അവിടെ അദ്ദേഹം അതിർത്തി പ്രദേശം സന്ദർശിക്കുകയും പ്രശ്നം നേരിട്ട് അനുഭവിക്കുകയും ചെയ്തിരുന്നു.

അതേ സമയം 2018 മുതൽ 100 ബില്യൺ ഗാലണിലധികം അസംസ്കൃത മലിനജലം ടിജുവാന നദിയിലേക്ക് ഒഴുകിയെന്നാണ് കണക്ക്. രാസവസ്തുക്കളും മാലിന്യങ്ങളും കലർന്ന ഇത് കാലിഫോർണിയയിലേക്ക് നിരന്തരം ഒഴുകുന്നു. മലിനീകരണം നീന്തൽക്കാരെയും കടൽത്തീരത്ത് പോകുന്നവരെയും മാത്രമല്ല അതിർത്തി പട്രോൾ ഏജന്റുമാരെയും കുട്ടികളെയും സ്കൂൾ ജീവനക്കാരെയും സാരമായി ബാധിക്കുന്നുണ്ട്. മലിനജലം വായുവിലേക്ക് ബാഷ്പീകരിക്കപ്പെടുകയും നുരയെ രൂപപ്പെടുത്തുമ്പോൾ ആളുകൾ ശ്വസിക്കുകയും ചെയ്യുന്നുവെന്ന് ശാസ്ത്രജ്ഞർ പറയുന്നു.

കൂടാതെ അതിർത്തിക്കടുത്തുള്ള കാലിഫോർണിയ ബീച്ചുകൾ കഴിഞ്ഞ നാല് വർഷത്തിനിടയിൽ ഭൂരിഭാഗവും അടച്ചിട്ടിരിക്കുകയാണ്. ഇതിനു പുറമെ ടിജുവാന നദിക്കരയിൽ താമസിക്കുന്ന ആളുകൾ വളരെക്കാലമായി ഈ പൊതുജനാരോഗ്യ പ്രതിസന്ധി നേരിടുന്നുവെന്ന് അമേരിക്കൻ റിവേഴ്‌സ് എന്ന സംഘടനയുടെ ഉദ്യോഗസ്ഥയായ ക്രിസ്റ്റൻ കൽബർട്ട് പറഞ്ഞു.

കഴിഞ്ഞ ഒക്ടോബറിൽ അധികാരമേറ്റ മെക്സിക്കോയുടെ പുതിയ പ്രസിഡന്റ് ക്ലോഡിയ ഷെയിൻബോം മലിനീകരണം ഗണ്യമായി കുറയ്‌ക്കുന്ന ഒരു പുതിയ മലിനജല ശുദ്ധീകരണ പ്ലാന്റ് തന്റെ സർക്കാർ നിർമ്മിക്കുമെന്ന് വാഗ്ദാനം ചെയ്തു. ഇപ്പോൾ അടുത്ത മാസത്തോടെ യുഎസ് സൗത്ത് ബേ ഇന്റർനാഷണൽ ട്രീറ്റ്‌മെന്റ് പ്ലാന്റിന്റെ വിപുലീകരണം പൂർത്തിയാക്കും. ഇതോടുകൂടി നദിയിലെ മലിനീകരണം ഒരു പരിധി വരെ നിയന്ത്രിക്കാൻ കഴിയുമെന്നാണ് വിശ്വാസം.