മുംബൈ:അദാനി ഉപഭോക്തൃ ഉല്പന്ന മേഖലയില് നിന്നും വിടവാങ്ങുന്നു. ഫോര്ച്യുണ്, കോഹിനൂര് എന്ന ബ്രാന്റ് നാമത്തില് ഭക്ഷ്യയെണ്ണയും അരിയും ഗോതമ്പുമാവും തുടങ്ങി നൂറുകണക്കിന് ഉല്പന്നങ്ങള് വില്ക്കുന്ന കമ്പനിയായ അദാനി വില്മര് ഇനിയില്ല. വില്മറില് അദാനിയ്ക്കുള്ള 20 ശതമാനം ഓഹരികള് ആകെ 10874 കോടി രൂപയ്ക്കാണ് വിറ്റത്. അദാനി വില്മര് എന്ന കമ്പനിയ്ക്ക് പകരം ഇനി വില്മര് ഇന്റര്നാഷണല് എന്ന കമ്പനി മാത്രമാണ് അവശേഷിക്കുക.
ഉപഭോക്തൃ രംഗത്ത് നിന്നും ഒഴിയുന്ന അദാനി ഊര്ജ്ജം, അടിസ്ഥാന സൗകര്യവികസന മേഖല എന്നിവയില് ശ്രദ്ധകേന്ദ്രീകരിക്കാന് തീരുമാനിച്ചിരിക്കുകയാണ്. അദാനി വില്മര് അഗ്രി ബിസിനസ് എന്ന കമ്പനിയില് അദാനിയ്ക്കുണ്ടായിരുന്ന 20 ശതമാനം ഓഹരി 275 രൂപ വീതം വിറ്റത് 7150 കോടി രൂപയ്ക്ക് സിംഗപ്പൂര് കേന്ദ്രമായി പ്രവര്ത്തിക്കുന്ന വില്മര് ഇന്റര്നാഷണല് എന്ന മാതൃകമ്പനിയ്ക്ക് വിറ്റു.
അദാനി വില്മറില് അദാനിയ്ക്കുണ്ടായിരുന്ന മറ്റൊരു 10.42 ശതമാനം ഏതാനും നിക്ഷേപകര്ക്കും അദാനി വിറ്റു. 3724 കോടി രൂപയ്ക്കാണ് ഈ ഓഹരികള് വിറ്റത്. ആരാണ് ഈ ഓഹരികള് വാങ്ങിയത് എന്ന കാര്യം വെളിപ്പെടുത്തിയിട്ടില്ല. നേരത്തെ, 2025 ജനവരിയില് അദാനി വില്മറിലെ ഒരു പങ്ക് ഓഹരികള് 4855 കോടി രൂപയ്ക്ക് വിറ്റിരുന്നു. ആകെ അദാനി വില്മറിലെ ഓഹരികള് വിറ്റ് അദാനി നേടിയത് 15,729 കോടി രൂപ ലഭിച്ചു. ഈ തുകയെല്ലാം അടിസ്ഥാന സൗകര്യവികസനരംഗത്ത് ചെലവഴിക്കുമെന്ന് അദാനി ഗ്രൂപ്പ് അറിയിച്ചു.
കോഹിനൂര് എന്ന പേരില് അരിയും മറ്റ് ഉല്പന്നങ്ങളും, ഫോര്ച്യുണ് എന്ന പേരില് ഭക്ഷ്യയെണ്ണ ഉല്പന്നങ്ങളും വിറ്റിരുന്ന അദാനി വില്മര് വടക്കേയിന്ത്യന് സംസ്ഥാനങ്ങളിലും പടിഞ്ഞാറേയിന്ത്യന് സംസ്ഥാനങ്ങളിലും വന്പ്രചാരമുള്ളവയാണ്.
