കണ്ണൂര് : ടി പി വധക്കേസില് ശിക്ഷിക്കപ്പെട്ട് കണ്ണൂര് സെന്ട്രല് ജയിലിലായിരുന്ന കെ കെ കൃഷ്ണന്(79) അന്തരിച്ചു. ന്യുമോണിയ ബാധയെ തുടര്ന്ന് പരിയാരം മെഡിക്കല് കോളേജ് ആശുപത്രിയില് ചികിത്സയിലിരിക്കെയാണ് മരണം.
ടി പി വധക്കേസില് പത്താം പ്രതിയാണ് കൃഷ്ണന്. സിപി എം ഒഞ്ചിയം ഏരിയ കമ്മിറ്റി മുന് അംഗവും വടകര ബ്ലോക്ക് പഞ്ചായത്തംഗവുമായിരുന്നു.
വിചാരണ കോടതി വെറുതെവിട്ട കെ കെ കൃഷ്ണനെ ഹൈക്കോടതിയാണ് ജീവപര്യന്തം ശിക്ഷിച്ചത്. 2024 ഫ്രെബ്രുവരിയിലാണ് ശിക്ഷ വിധിച്ചത്.
ജയിലില് വച്ച് രോഗബാധിതനായതിനെ തുടര്ന്നു ഇക്കഴിഞ്ഞ ജൂണ് 24 മുതല് പരിയാരം മെഡിക്കല് കോളേജില് ചികിത്സയിലായിരുന്നു.കര്ഷക സംഘം ജില്ലാ കമ്മിറ്റി അംഗം, സിപിഎം ഏറാമല ലോക്കല് കമ്മിറ്റി അംഗം, പുറമേരി സര്വീസ് സഹകരണ ബാങ്ക് ഡയറക്ടര് എന്നീ നിലകളില് പ്രവര്ത്തിച്ചിട്ടുണ്ട് കെ കെ കൃഷ്ണന്.
