ഇസ്ലാമബാദ്: ഓപ്പറേഷന്‍ സിന്ദൂറിന് ശേഷം പാകിസ്ഥാനില്‍ ഹിന്ദു സംസ്കാരത്തോട് ബഹുമാനം കൂടിയോ? അങ്ങിനെ തോന്നിപ്പിക്കും വിധമാണ് കാര്യങ്ങളുടെ മാറ്റങ്ങള്‍. . ഇപ്പോഴിതാ പാകിസ്ഥാനിലെ കറാച്ചിയില്‍ ഇന്ത്യയുടെ ഇതിഹാസമായ രാമായണത്തെക്കുറിച്ചുള്ള നാടകം അരങ്ങേറി. നിരവധി പേര്‍ ഈ രാമായണനാടകത്തെ പുകഴ്‌ത്തിയതായും പറയുന്നു.
യോഗേശ്വര്‍ കരേര സംവിധാന ചെയ്ത ഈ നാടകം മൗജ് എന്ന ഗ്രൂപ്പാണ് കറാച്ചി ആര്‍ട്സ് കൗണ്‍സിലില്‍ അവതരിപ്പിച്ചത്. തിന്മയുടെ മേല്‍ നന്മ നേടുന്ന വിജയമാണ് രാമായണം. ഇന്ത്യയുടെ പുരാണത്തിന്റെ ഭാഗമായ ഈ രാമായണകഥ വലിയ മാറ്റങ്ങളൊന്നുമില്ലാതെ അവതരിപ്പിച്ചിട്ടും രാമനെയും സീതയെയും കാണികള്‍ വരവേറ്റു എന്നാണ് റിപ്പോര്‍ട്ടുകള്‍.
“പാകിസ്ഥാനിലെ കാണികള്‍ കൂടുതല്‍ സഹിഷ്ണുതയുള്ളവരാണ്. രാമായണം സ്റ്റേജില്‍ കൊണ്ടുവരിക എന്നത് സ്വപ്നമായിരുന്നു.”-യോഗേശ്വര്‍ കരേര പറയുന്നു. നാടകത്തെ ശക്തമായ അനുഭവമാക്കി മാറ്റാന്‍ എഐ സാങ്കേതിക വിദ്യയും ഉപയോഗിച്ചു.
റാണാ കാസ്മി എന്ന നടിയാണ് സീതയായി അഭിനയിച്ചത്. ഇന്നത്തെ കാണികള്‍ക്ക് ഈ പഴയകാലത്തെ കഥ അനുഭവവേദ്യമാക്കാന്‍ കഴിഞ്ഞതില്‍ സന്തോഷമുണ്ടെന്ന് റാണാ കാസ്മി. ലോകമെമ്പാടുമുള്ള ദശലക്ഷക്കണക്കിന് പേരുമായി സംവദിച്ച രാമായണത്തിന്റെ കഥാഖ്യാനം ഗംഭീരമാണെന്നും വിമര്‍ശകനായ ഒമെര്‍ ആല്‍വി പറയുന്നു.
