തിരുവനന്തപുരം: വിമാനത്താവള വികസനത്തിനായി ചാക്ക ആള്‍സെയിന്റ്‌സ് റോഡ് ഏറ്റെടുക്കുന്നു. 18 ഏക്കറോളം സ്ഥലമാണ് ഏറ്റെടുക്കാന്‍ ഒരുങ്ങുന്നത്. ചാക്ക ഫയര്‍ സ്റ്റേഷന്, ബ്രഹ്‌മോസിന്റെ മുന്‍ഭാഗം, ശംഖുംമുഖത്തേക്ക് പോകുന്ന പ്രധാന റോഡ് ഉള്‍പ്പെടെയുള്ള ഭാഗങ്ങളാണ് ഏറ്റെടുക്കുക. ഇതോടെ നിലവിലെ ചാക്ക ഓള്‍സെയിന്റ്‌സ് കോളജ് റോഡ് വിമാനത്താവള വികസനത്തിന് ഉപയോഗിക്കും. പകരം ശംഖുംമുഖത്തേക്ക് പോകാന്‍ ചാക്ക ഐടിഐ ജംഗ്ഷനില്‍ നിന്ന് റെയില്‍വേ ട്രാക്കിന് സമാന്തരമായി ഓള്‍സെയിന്റ്‌സ് കോളജ് ജംഗ്ഷനിലെത്തുന്ന രീതിയില്‍ പുതിയ റോഡ് നിര്‍മിക്കാനാണ് പ്രാഥമിക ചര്‍ച്ചകള്‍ നടക്കുന്നത്. അവിടെ നിലവിലെ റോഡിലെത്തിച്ചേര്‍ന്ന് ശംഖുംമുഖം, വേളി, പെരുമാതുറ ഭാഗങ്ങളിലേക്ക് പോകാവുന്ന രീതിയിലാണ് പുതിയ റോഡ് നിര്‍മിക്കുക. ഇതിനായി ബ്രഹ്‌മോസില്‍ നിന്നും ഭൂമി ഏറ്റെടുക്കും.
വിമാനത്താവള വികസനം നടന്നില്ലെങ്കില്‍ വലിയ വിമാനങ്ങള്‍ ലാന്‍ഡ് ചെയ്യാനുള്ള അനുമതി നഷ്ടപ്പെടുമെന്ന ഡയറക്ടര്‍ ജനറല്‍ ഒഫ് സിവില്‍ ഏവിയേഷന്റെ (ഡിജിസിഎ) മുന്നറിയിപ്പിനെ തുടര്‍ന്നാണ് റണ്‍വേ അടക്കം വികസിപ്പിക്കുന്നതിനുള്ള തയ്യാറെടുപ്പുകള്‍ തുടങ്ങിയത്. സ്ഥലമേറ്റെടുപ്പ് വേഗത്തിലാക്കാന്‍ മുഖ്യമന്ത്രി പിണറായി വിജയന്‍ നിര്‍ദ്ദേശം നല്‍കിയതോടെ റവന്യൂ വകുപ്പ് സ്ഥലമെറ്റെടുക്കുന്നതിനുള്ള നടപടികള്‍ ആരംഭിച്ചു.
റവന്യൂ വകുപ്പ് ഏറ്റെടുക്കുന്ന ഭൂമി എയര്‍പോര്‍ട്ട് അതോറിട്ടിക്ക് കൈമാറുകയും വിമാനത്താവളത്തിന്റെ നടത്തിപ്പ് ചുമതലയുള്ള അദാനി ഗ്രൂപ്പ് ഭൂമിയുടെ വില നല്‍കുകയും വികസന പ്രവര്‍ത്തനങ്ങള്‍ നടത്തുകയും ചെയ്യും.
റണ്‍വേയുടെ ഇരുവശത്തെയും സുരക്ഷ സോണ്‍ 150 മീറ്റര്‍ വീതിയില്‍ വികസിപ്പിക്കണമെന്നാണ് ഡിജിസിഎ യുടെ നിര്‍ദ്ദേശം. ശംഖുംമുഖം ഭാഗത്ത് 150 മീറ്റര്‍ വീതിയുണ്ടെങ്കിലും ചാക്ക ഭാഗത്ത് നിര്‍ദ്ദിഷ്ട വീതിയില്ലാത്തതിനാലാണ് ഭൂമി ഏറ്റെടുക്കുന്നത്. ചാക്ക ഫയര്‍സ്‌റ്റേഷന്റെ ഉടമസ്ഥതയിലുള്ള 10.5 ഏക്കര്‍ സ്ഥലമാണ് കൂടുതല്‍ ഏറ്റെടുക്കേണ്ടി വരുന്നത്. വിമാനത്താവളത്തിന് സമീപം ചാക്ക ഫയര്‍ സ്റ്റേഷന് സ്ഥലം കണ്ടെത്തിയിട്ടുണ്ട്. എയര്‍പോര്‍ട്ടിനടുത്തുതന്നെ ഫയര്‍ സ്റ്റേഷന് വേണം എന്നുള്ളതു കൊണ്ടാണ് അടുത്തു തന്നെ സ്ഥലം കണ്ടെത്തിയത്. ബ്രഹ്‌മോസിന്റെ മുന്‍വശത്തെ റോഡിന് ചേര്‍ന്നുള്ള 1.5 ഏക്കറും നിലവിലെ റോഡും ഉള്‍പ്പടെ ആകെ 18 ഏക്കറാണ് ഏറ്റെടുക്കുന്നത്. ബ്രഹ്‌മോസ് പൂര്‍ണമായും മാറ്റില്ല. നിലവില്‍ ഏറ്റെടുക്കുന്ന സ്ഥലത്തിന് പകരം സ്ഥലം നല്‍കണമെന്ന് ബ്രഹ്‌മോസ് ആവശ്യം ഉന്നയിച്ചിട്ടുണ്ട്.
ജന്മഭൂമി ഓണ്‍ലൈന്‍