കോഴിക്കോട്: കോഴിക്കോട് നടക്കുന്ന എസ്എഫ്ഐ ദേശീയ സമ്മേളനം കൊഴുപ്പിക്കാൻ സർക്കാർ സ്കൂളിന് അവധി നൽകി അധികൃതർ. മെഡിക്കൽ കോളേജ് ക്യാമ്പസ് ഹൈസ്കൂളിനാണ് അവധി നൽകിയത്. അവധി നൽകിയ എസ്എഫ്ഐയുടെ ആവശ്യപ്രകാരമാണെന്ന് ഹെഡ് മാസ്റ്റർ സുനിൽ പറഞ്ഞു.
വിദ്യാർത്ഥി സംഘടനകളുടെ ആവശ്യം നിരസിക്കാൻ തനിക്ക് കഴിയില്ലെന്നും ഹെഡ് മാസ്റ്റർ പറഞ്ഞു. ഹൈസ്കൂൾ വിദ്യാർത്ഥികൾക്കാണ് അവധി നൽകിയതെന്നും എൽ പി, യുപി വിഭാഗത്തിന് അവധി നൽകിയിട്ടില്ലെന്നും അദ്ദേഹം വ്യക്തമാക്കി. നേരത്തേ കെ എസ് യു ഒരു സമരം നടത്തിയ ഘട്ടത്തിൽ സ്കൂളിന് അവധി നൽകിയിരുന്നില്ല. എന്നാൽ സമരക്കാർ വന്ന് സ്കൂൾ ബല്ല് അടിക്കുകയും നിയമം കൈയിലെടുക്കുകയും ചെയ്തിരുന്നു.
വിവരമറിയിച്ചതിനെ തുടർന്ന് പോലീസ് എത്തിയെങ്കിലും വിദ്യാർത്ഥി സംഘടനകളുമായി സഹകരിച്ചുകൂടേയെന്നാണ് തന്നോട് ചോദിച്ചതെന്നും ഹെഡ്മാസ്റ്റർ പറയുന്നു.
