ചെന്നൈ: പുതുച്ചേരിയില്‍ ക്രിപ്‌റ്റോ കറന്‍സി തട്ടിപ്പുമായി ബന്ധപ്പെട്ട് നടിമാരായ തമന്ന, കാജല്‍ അഗര്‍വാള്‍ എന്നിവര്‍ക്കു നോട്ടീസ് അയയ്‌ക്കാന്‍ സൈബര്‍ ക്രൈം പോലീസ്. മുന്‍ കേന്ദ്ര സര്‍ക്കാര്‍ ജീവനക്കാരന്റെ 98 ലക്ഷത്തോളം രൂപ തട്ടിയെന്ന പരാതിയിലെ അന്വേഷണത്തില്‍ അഷ്‌പെ എന്ന വെബ്‌സൈറ്റ് നിര്‍മിച്ചയാള്‍ അടക്കം അഞ്ചു പേര്‍ പിടിയിലായിരുന്നു. ഇവരില്‍ നിന്ന് രണ്ടു കാറുകള്‍, മൊബൈല്‍ ഫോണ്‍, ലാപ്‌ടോപ്, പണം എന്നിവയും പിടിച്ചെടുത്തു.
തമന്ന, കാജല്‍ അഗര്‍വാള്‍ എന്നിവര്‍ കമ്പനിയുടെ ഉദ്ഘാടനത്തിനും പ്രചാരണത്തിനും പണം കൈപ്പറ്റിയതായി പോലീസ് പറയുന്നു. തമന്നയ്‌ക്ക് 34 ലക്ഷം രൂപയും കാജല്‍ അഗര്‍വാളിന് 28 ലക്ഷം രൂപയും നല്‍കിയെന്നാണ് ആരോപണം. ഇതേത്തുടര്‍ന്നാണ് ഇരുവര്‍ക്കും നോട്ടീസ് അയയ്‌ക്കാന്‍ പോലീസ് തീരുമാനിച്ചത്. കേസിലെ പ്രധാന പ്രതിയായ ദുബായ് സ്വദേശിയെ അറസ്റ്റ് ചെയ്യാനുള്ള നടപടികള്‍ പുരോഗമിക്കുകയാണെന്നു പൊലീസ് അറിയിച്ചു.
