കണ്ണൂര്‍: ആള്‍ക്കൂട്ടവിചാരണ നേരിട്ടതില്‍ മനംനൊന്ത് കായലോട് പറമ്പായിയില്‍ റസീന മന്‍സിലില്‍ റസീന (40) തൂങ്ങിമരിച്ച സംഭവത്തില്‍ മൂന്ന് എസ്ഡിപിഐ പ്രവര്‍ത്തകര്‍ അറസ്റ്റില്‍. പറമ്പായി സ്വദേശികളായ വിസി മുബഷീര്‍(28), വികെ റഫ്നാസ്(24), കെഎ ഫൈസല്‍(34) എന്നിവരാണ് പിടിയിലായത്. തലശേരി ഫസ്റ്റ് ക്‌ളാസ് മജിസ്‌ടേറ്റ്‌കോടതി ഇവരെ റിമാന്‍ഡു ചെയ്തു. സംഭവത്തില്‍ കൂടുതല്‍ പ്രതികള്‍ ഉള്ളതായി പൊലീസ് പറഞ്ഞു. യുവതിയുടെ ആത്മഹത്യക്കുറിപ്പിലെ പരാമര്‍ശത്തെത്തുടര്‍ന്നാണ് മൂന്നു പേരെ അറസ്റ്റ് ചെയ്തത്.
ഞായറാഴ്ച അച്ചങ്കര പള്ളിക്ക് സമീപം കാറിനടുത്ത് നിന്ന് റസീന ആണ്‍ സുഹൃത്തിനോട് സംസാരിച്ചതാണ് എസ്ഡിപിഐ പ്രവര്‍ത്തകരെ പ്രകോപിപ്പിച്ചത്. ഇതേത്തുടര്‍ന്ന് സംഘം യുവതിയെ അധിക്‌ഷേപിച്ച് വീട്ടിലേക്കു പറഞ്ഞയയ്‌ക്കുകയും യുവാവിനെ മര്‍ദ്ദിച്ചശേഷം പിടിച്ചുകൊണ്ടുപോവുകയുമായിരുന്നു. യുവാവിനെ രാത്രിവരെ എസ്ഡിപിഐ ഓഫീസിലടക്കം തടഞ്ഞുവച്ച് ആള്‍ക്കൂട്ട വിചാരണ നടത്തി. റസീനയുടെയും യുവാവിന്റെയും ബന്ധുക്കളെ വിളിച്ചുവരുത്തി താക്കീതു ചെയ്ത ശേഷം രാത്രിയോടെയാണ് വിട്ടയച്ചത്.
മൊബൈലും ടാബും പിടിച്ചെടുക്കുകയും ചെയ്തു. ഇതേത്തുടര്‍ന്നുണ്ടായ മാനസികാഘാതത്തിലാണ് റസീന ആത്മഹത്യ ചെയ്തതെന്ന് പൊലീസ് പറഞ്ഞു.
