കൊച്ചി: ടൈംസ് ഹയര് എഡ്യൂക്കേഷന് ഇംപാക്റ്റ് റാങ്കിങ്ങില് കൊച്ചി ശാസ്ത്രസാങ്കേതിക സര്വ്വകലാശാല (കുസാറ്റ്) ആഗോളതലത്തില് 401-600 ബാന്ഡില് ഇടംപിടിച്ചു. ടൈംസ് റാങ്കിങ്ങില് ഇന്ത്യയില് പതിനേഴാം സ്ഥാനത്തും കേരളത്തില് ഒന്നാമതുമാണ് കുസാറ്റ്. 2025 ലെ ക്യു എസ് റാങ്കിലും ലോകത്തെ മികച്ച ആയിരം സ്ഥാപനങ്ങളില് ഒന്നായിരുന്നു കുസാറ്റ് .
വിവിധ സുസ്ഥിര വികസന ലക്ഷ്യങ്ങളില് മികച്ച റാങ്കിങ് കുസാറ്റ് നേടി. വെള്ളത്തിനടിയിലെ ജീവന് എന്ന വിഭാഗത്തിലാണ് ഏറ്റവും മികച്ച നേട്ടം. ആഗോളതലത്തില് അമ്പത്തിയെട്ടാം സ്ഥാനവും ദേശീയ-സംസ്ഥാനതലങ്ങളില് ഒന്നാം സ്ഥാനവുമാണ് കുസാറ്റിന്. ശക്തമായ മറൈന് സയന്സ് വകുപ്പുകളും മികച്ച ഗവേഷണ പ്രവര്ത്തനങ്ങളും സാമൂഹ്യപ്രവര്ത്തനങ്ങളും സമുദ്രസംരക്ഷണ ആവാസവ്യവസ്ഥാ സംരക്ഷണ പ്രവര്ത്തനങ്ങളും സര്വ്വകലാശാലയ്ക്ക് ഈ മികവ് നേടുന്നതില് പ്രധാന പങ്കുവഹിച്ചു. മാന്യമായ തൊഴില് സാമ്പത്തികവളര്ച്ച എന്ന വിഭാഗത്തില് 301-400 ബാന്ഡിലുള്പ്പെട്ട കുസാറ്റ്, ദേശീയ-സംസ്ഥാനതലങ്ങളില് ഒന്നാം റാങ്കും നേടി. ലിംഗസമത്വത്തില് ആഗോളതലത്തില് 201-300 ബാന്ഡില് ഇടവും ദേശീയ തലത്തില് ഒന്പതാം റാങ്കും സംസ്ഥാന തലത്തില് ഒന്നാം റാങ്കും സര്വ്വകലാശാലയ്ക്ക് ലഭിച്ചു.
