കൊല്ലം: ചായ മേശയുടെ ചില്ല് കാലിൽ തുളച്ച് കയറി നലു വയസ്സുകാരന് ദാരുണാന്ത്യം. കുണ്ടറ, കുമ്പളം വിളയിലഴികത്ത് വീട്ടിൽ സുനീഷ് – ലോറൻസ് റൂബി ദമ്പതികളുടെ മകൻ എയ്ദൻ സുനീഷ് ആണ് മരിച്ചത്. കുസളം സെന്റ് ജോസഫ് ഇന്റർനാഷണൽ സ്കൂളിലെ എൽ.കെ.ജി വിദ്യാർത്ഥിയാണ്. കഴിഞ്ഞ ദിവസം വൈകിട്ട് നാലോടെടെയാണ് സംഭവം.
ഗ്ലാസ് തകർന്ന് കുട്ടിയുടെ കാൽപാദത്തിലും തുടയിലും തുളച്ചുകയറുകയായിരുന്നു. ചായ മേശയിൽ കയറിയതായിരിക്കാം അപകടത്തിന് കാരണമെന്ന് പറയപ്പെടുന്നു. കുളിപ്പുരയിലായിരുന്ന മാതാവ് പുറത്തിറങ്ങിയപ്പോൾ ചോര വാർന്ന് കിടക്കുന്ന മകനെ കാണുകയും ഉടൻ തന്നെ ആശുപത്രിയിലെത്തിക്കുകയും ചെയ്തതെങ്കിലും ജീവൻ രക്ഷിക്കാനായില്ല. സംഭവ സമയത്ത് വീട്ടിൽ കുട്ടിയും അമ്മയും മാത്രമാണ് ഉണ്ടായിരുന്നത്.
നടപടികൾക്ക് ശേഷം മൃതദേഹം ഇന്നലെ വൈകിട്ട് കുമ്പളം സെൻ്റ് മൈക്കിൾസ് പള്ളി സെമിത്തേരിയിൽ സംസ്കരിച്ചു. പേരയം കളർ വേൾഡ് പെയിൻറ് കടയുടമയാണ് സുനീഷ് . റൂബി കൊല്ലത്തെ സ്വകാര്യ ആശുപത്രി നഴ്സിംഗ് ട്യൂട്ടറും സഹോദരൻ ആദി സെൻ്റ് ജോസഫ് സ്കൂളിലെ നാലാം ക്ലാസ് വിദ്യാർത്ഥിയുമാണ്.
