തിരുവനന്തപുരം: ദേശസ്‌നേഹവും ഭക്തിയും കോര്‍ത്തിണക്കി തിരുവനന്തപുരം വാനമ്പാടികള്‍ അവതരിപ്പിച്ച ഗാനങ്ങള്‍ ജന്മഭൂമി സുവര്‍ണ ജൂബിലി ആഘോഷങ്ങള്‍ക്ക് മാറ്റ് കൂട്ടി. ഒരുകാലത്ത് ഭാരത സ്വാതന്ത്ര്യ സമരകാലഘട്ടത്തെ ഉത്തേജിപ്പിച്ച ദേശഭക്തിഗാനങ്ങളും ശാന്തി പകര്‍ന്ന പ്രാര്‍ത്ഥനാഗീതങ്ങളും വീണ്ടും ശ്രോതാക്കളുടെ മനസില്‍ ദേശസ്‌നേഹത്തിന്റെയും ഭക്തിയുടെയും വിപഞ്ചിക മീട്ടി. അനിത പി.വി.യുടെ നേതൃത്വത്തില്‍ കേന്ദ്രമന്ത്രിയും സിനിമാ താരവുമായ സുരേഷ്‌ഗോപിയുടെ ഭാര്യ രാധിക സുരേഷ്, ആശാ അജയ്, അമ്പിളി ശ്യാം, ആശാലക്ഷ്മി, വൃന്ദാ രജനീഷ്, വീണ സന്തോഷ്, കവിതാ റാണി, സിന്ധു വിനോദ്, ബീനാ സുശീല്‍, ശാന്തി അനില്‍കുമാര്‍ എന്നിവരാണ് ഗാനങ്ങള്‍ ആലപിച്ചത്. ശരത്കൃഷ്ണന്‍, ഷൈന്‍ജോസ്, കണ്ണന്‍ പൂജപ്പുര എന്നിവരുടെ ഓര്‍ക്കസ്ട്രയിലായിരുന്നു ആലാപനം.
ഹംകോ മന്‍ കീ ശക്തി ദേന എന്നു തുടങ്ങുന്ന പ്രാര്‍ത്ഥനാഗാനം 1971ല്‍ ഇറങ്ങിയ ഗുഡി എന്ന ഹിന്ദി സിനിമയില്‍ ഗുല്‍സാര്‍ എഴുതി വസന്ത് ദേശായി സംഗീതം പകര്‍ന്ന് വാണീ ജയറാം ആലപിച്ചതാണ്. അത് കാലാതിവര്‍ത്തിയായി ഇന്നും നിലനില്‍ക്കുന്നതാണ്. ഭാരത ഹൃദയ വിപഞ്ചിയിലുണരും രാഗമാലിക നാം.. ഒരു രാഗമാലിക നാം എന്ന ഗീതം ഒഎന്‍വി കുറുപ്പ് എഴുതിയതാണ്. ഈഗാനം അന്നും ഇന്നും മലയാള മനസില്‍ ദേശഭക്തിയുടെ വിപഞ്ചിക മീട്ടുന്നതാണ്. ആത്താ ഉടവൂ സാരെ റാന്‍, ഖില ഉഡാ ഭൂല്‍ ജീവന്‍ കാ ജല്‍, ജയ് ജന് ഭാരത് ജന് മന്‍ അഭിമന്‍ തുടങ്ങിയ ഗാനങ്ങളും ശ്രോതാക്കളെ ദേശഭക്തിലഹരിയില്‍ ആറാടിച്ചു. അനിത പി.വി.യുടെ നേതൃത്വത്തില്‍ നിരവധി നാളത്തെ പരിശീലനത്തിലൂടെയാണ് വാനമ്പാടികള്‍ ഒരേ സ്വരത്തില്‍ ഗാനം ആലപിക്കുന്നത്.
ജന്മഭൂമി ഓണ്‍ലൈന്‍