തിരുവനന്തപുരം: ഭാരതത്തിന്റെ ഒളിമ്പിക്‌സ് പ്രതീക്ഷകള്‍ സാക്ഷാത്കരിക്കുന്നതിനൊപ്പം കേരളത്തിന്റെ സ്വപ്‌നങ്ങള്‍ക്കും ചിറകേകി ജന്മഭൂമി സുവര്‍ണ ജൂബിലി ആഘോഷ സെമിനാര്‍. കായികരംഗത്തെ മാറ്റങ്ങള്‍ എണ്ണിപ്പറഞ്ഞ് അഞ്ജു ബോബി ജോര്‍ജും ഐ.എം. വിജയനും യു. വിമല്‍കുമാറും ഉള്‍പ്പെടെയുള്ള കായിക താരങ്ങള്‍. ഭാരതത്തിന്റെ ആരോഗ്യ- സുഖ ചികിത്സയിലെ അനന്തസാധ്യതകള്‍ക്കുള്ള നിര്‍ദേശങ്ങളുമായി ആരോഗ്യ, ടൂറിസം മേഖലയിലെ വ്യവസായികള്‍. അനശ്വര ഗാനങ്ങള്‍ കോര്‍ത്തിണക്കി പിന്നണി ഗായകന്‍ ശ്രീനിവാസിന്റെ സംഗീതനിശ. സുവര്‍ണ ജൂബിലി ആഘോഷത്തിന്റെ രണ്ടാംദിനമായിരുന്നു ഇന്നലെ.
2036ലെ ഒളിമ്പിക്‌സില്‍ മികച്ച നേട്ടം കൊയ്യാന്‍ ഭാരതം നടപ്പാക്കുന്ന പദ്ധതികളില്‍ ശുഭാപ്തി വിശ്വാസവും സ്‌കൂളുകളില്‍ കളിക്കളങ്ങള്‍ ഇല്ലാതാകുന്നതിന്റെ ആശങ്കയും പങ്കുവച്ചാണ് അത്‌ലറ്റിക് ഫെഡറേഷന്‍ ഓഫ് ഇന്ത്യ വൈസ് പ്രസിഡന്റ് ഒളിമ്പ്യന്‍ അഞ്ജു ബോബി ജോര്‍ജ് സെമിനാറിനെ അഭിസംബോധന ചെയ്തത്. കളിക്കളങ്ങളില്ലാത്ത സ്‌കൂളുകളില്‍ നിന്നും നല്ലൊരു കായികതാരത്തെ എങ്ങനെ കണ്ടെത്താനാകുമെന്ന ചോദ്യം സദസ് ഏറ്റെടുത്തു. കായികതാരത്തിന്റെ സ്വപ്‌ന സാക്ഷാത്കാരത്തിനൊപ്പം നില്‍ക്കാന്‍ ആരുമില്ലാത്ത സാഹചര്യം മാറി, പ്രോത്സാഹനങ്ങളുടെ ഒരുപിടി വാതായനങ്ങള്‍ ഭാരതം തുറന്നിട്ടുണ്ട്. അവര്‍ പറഞ്ഞു.
ടൂര്‍ണമെന്റുകള്‍ ഇല്ലാതായതോടെ കായികതാരങ്ങള്‍ക്ക് മികച്ച ഫോമുകളിലേക്ക് എത്താനാകുന്നില്ലെന്ന ആശങ്ക ഐ.എം. വിജയനും മുന്നോട്ടുവച്ചു. വരുന്ന ഒളിമ്പിക്‌സില്‍ നിരവധി തവണ ഭാരതപതാക പാറിക്കുമെന്ന ഉറപ്പാണ് ഐഒഎ ജോ. സെക്രട്ടറി കല്യാണ്‍ ചൗബെ നല്കിയത്. ഹോക്കി താരം ഒളിമ്പ്യന്‍ ദിനേശ് നായിക്, ദ്രോണാചാര്യ അവാര്‍ഡ് ജേതാവ് യു. വിമല്‍കുമാര്‍, ക്രീഡാഭാരതി ദേശീയ ഓര്‍ഗനൈസിങ് സെക്രട്ടറി പ്രസാദ് മഹാങ്കര്‍, അന്താരാഷ്ട്ര വോളിബോള്‍ താരവും മുന്‍ ഐജിയുമായ എസ്. ഗോപിനാഥ്, ജനം ടിവി ചീഫ് എഡിറ്റര്‍ പ്രദീപ് പിള്ള, കേരള സ്‌പോര്‍ട്‌സ് കൗണ്‍സില്‍ മുന്‍ പ്രസിഡന്റ് പദ്മിനി തോമസ്, സ്‌പോര്‍ട്‌സ് ഡയറക്ടര്‍ വിഷ്ണുരാജ്, കേരള ഒളിമ്പിക്‌സ് അസോസിയേഷന്‍ പ്രസിഡന്റ് വി. സുനില്‍കുമാര്‍, സെക്രട്ടറി എസ്. രാജീവ്, സായി അസോ. പ്രൊഫസറും ഫുട്‌ബോള്‍ പരിശീലകനുമായ പ്രദീപ് ദത്ത, ജന്മഭൂമി എഡിറ്റര്‍ കെഎന്‍ആര്‍ നമ്പൂതിരി എന്നിവരും പങ്കെടുത്തു.
