കോട്ടയം: പുതിയ കെ.പി.സി.സി പ്രസിഡന്റിനെച്ചൊല്ലി കോണ്ഗ്രസില് അഭ്യന്തര കലഹം. സംസ്ഥാനത്ത് നേതൃമാറ്റം വേണമെന്ന് ഖാര്ഗെയും രാഹുല് ഗാന്ധിയും സുധാകരനെ അറിയിച്ചതായി റിപ്പോര്ട്ടുകളുണ്ടായിരുന്നു. ഇതേത്തുടര്ന്നാണ് കോണ്ഗ്രസ് രാഷ്ട്രീയം കലങ്ങി മറിഞ്ഞത്.
പല പേരുകളും ഉയരുകയും ചില മത സംഘടനകള് തങ്ങളുടെ ആളെ പ്രസിഡന്റാക്കണമെന്ന് ആവശ്യമുന്നയിക്കുകയും അതേസമയം മാറേണ്ട സാഹചര്യം ഇപ്പോഴില്ലെന്ന് കെ സുധാകരന് വ്യക്തമാക്കുകയും ചെയ്ത പശ്ചാത്തലത്തില് നേതൃത്വം ഇടപെട്ട് അനിശ്ചിതത്വം നീക്കണമെന്ന് യൂത്ത് കോണ്ഗ്രസ് പ്രസിഡന്റ് രാഹുല് മാങ്കൂട്ടത്തില് ആവശ്യപ്പെട്ടു. വരാന് പോകുന്നത് അംഗന്വാടി തിരഞ്ഞെടുപ്പല്ലെന്നും നേതാക്കള് ഉത്തരവാദിത്വം പ്രകടിപ്പിക്കണമെന്നുമാണ് അദ്ദേഹത്തിന്റെ ആവശ്യം. അണികളുടെ ആത്മവിശ്വാസം തകര്ക്കരുതെന്നും യുവജന സംഘടനാനേതാക്കള് കാട്ടുന്ന അച്ചടക്കം മുതിര്ന്ന നേതാക്കള് കാട്ടണമെന്നും രാഹുല് പറഞ്ഞു.
അതേസമയം പ്രസിഡന്റിനെ മാറ്റുമെന്നോ പുതിയ പ്രസിഡന്റ് വരുമെന്നോ മാദ്ധ്യമപ്രവര്ത്തകര് അടക്കം ആരും തീരുമാനിക്കേണ്ടെന്നും ഞങ്ങള് തീരുമാനിച്ചോളാമെന്നും എഐസിസി ജനററല് സെക്രട്ടറി കെ.സി വേണുഗോപാല് മുന്നറിയിപ്പു നല്കി.
സുധാകരനെ അനുകൂലിച്ച് പാലക്കാട് അടക്കം പലയിടത്തും പോസ്റ്റര് പ്രത്യക്ഷപ്പെട്ടിട്ടുണ്ട്. പിണറായിയെ അടിക്കാന് കോണ്ഗ്രസില് സുധാകരനു മാത്രമേ കഴിയൂ എന്ന് പോസ്റ്ററില് പറയുന്നു.
കെ. സുധാകരനു പകരം പാര്ട്ടി പരിഗണിക്കുന്ന നേതാക്കള്ക്കെതിരെയും പോസ്റ്ററുകള് ഒട്ടിച്ചിട്ടുണ്ട്. സേവ് കോണ്ഗ്രസ് എന്ന പേരിലാണ് ആലുവയില് പോസ്റ്ററുകള് പ്രത്യക്ഷപ്പെട്ടത്. ഫോട്ടോ കണ്ടാല് സാധാരണ കോണ്ഗ്രസ് പ്രവര്ത്തകര് പോലും തിരിച്ചറിയാത്ത ആന്റോ ആന്റണിയും സണ്ണി ജോസഫുമല്ല കേരളത്തിലെ കോണ്ഗ്രസിനെ നയിക്കേണ്ടതെന്ന കെ. മുരളീധരന്റെ പരിഹാസം പോസ്റ്ററില് ആവര്ത്തിക്കുന്നു.
