ന്യൂദല്‍ഹി: ഗവര്‍ണര്‍മാര്‍ മാറ്റിവച്ച ബില്ലുകളില്‍ നടപടിയെടുക്കാന്‍ രാഷ്‌ട്രപതിക്ക് സമയപരിധി നിശ്ചയിച്ച സുപ്രീം കോടതി വിധിയില്‍ ഉപരാഷ്ട്രപതി ജഗ്ദീപ് ധന്‍ഖര്‍ കടുത്ത ആശങ്ക പ്രകടിപ്പിച്ചു. ജുഡീഷ്യറി നിയമനിര്‍മ്മാണ, നിര്‍വഹണ മേഖലകളില്‍ കടന്നുകയറ്റം നടത്തുകയാണോയെന്നും ‘സൂപ്പര്‍ പാര്‍ലമെന്റ്’ ആയി മാറുകയാണോ എന്നും ധന്‍ഖര്‍ ചോദിച്ചു. ജനങ്ങളോട് ഉത്തരവാദിത്തമില്ലാതെ ജഡ്ജിമാര്‍ നിയമനിര്‍മ്മാണം നടത്താന്‍ തുടങ്ങിയാല്‍ ഉണ്ടാകുന്ന അനന്തരഫലങ്ങളെക്കുറിച്ച് ധന്‍കര്‍ മുന്നറിയിപ്പ് നല്‍കി. ആര്‍ട്ടിക്കിള്‍ 142 നെ ‘ജനാധിപത്യ ശക്തികള്‍ക്കെതിരായ ആണവ മിസൈല്‍’ എന്ന് വിശേഷിപ്പിച്ച ഉപരാഷ്ട്രപതി, കോടതികള്‍ രാഷ്‌ട്രപതിയെ നിര്‍ദ്ദേശിക്കുന്ന സാഹചര്യം ഉണ്ടാകാന്‍ പാടില്ലെന്ന് വ്യക്തമാക്കി.
‘നമ്മള്‍ എവിടേക്കാണ് പോകുന്നത്? രാജ്യത്ത് എന്താണ് സംഭവിക്കുന്നത്? ഇക്കാര്യത്തില്‍ ആരെങ്കിലും റിവ്യൂ പെറ്റീഷന്‍ ഫയല്‍ ചെയ്യണോ വേണ്ടയോ എന്നതല്ല പ്രശ്‌നം. ഈ ദിവസത്തേക്ക് ജനാധിപത്യത്തിനായി ഞങ്ങള്‍ ഒരിക്കലും വിലപേശിയിട്ടില്ല,’ ഉപരാഷ്‌ട്രപതിയുടെ എന്‍ക്ലേവില്‍ രാജ്യസഭാ ഇന്റേണുകളുടെ ആറാം ബാച്ചിനെ അഭിസംബോധന ചെയ്തുകൊണ്ട് ധന്‍ഖര്‍ പറഞ്ഞു.
രാഷ്‌ട്രപതിക്ക് കോടതി നിര്‍ദ്ദേശം നല്‍കുന്ന ഒരു സാഹചര്യം എന്തിന്റെ അടിസ്ഥാനത്തിലാണ്? ഭരണഘടന പ്രകാരം നിങ്ങള്‍ക്ക് ഉള്ള ഏക അവകാശം ആര്‍ട്ടിക്കിള്‍ 145(3) പ്രകാരം ഭരണഘടന വ്യാഖ്യാനിക്കുക എന്നതാണ്,’ അദ്ദേഹം ഓര്‍മ്മിപ്പിച്ചു.
ഡല്‍ഹി ഹൈക്കോടതി ജഡ്ജി ജസ്റ്റിസ് യശ്വന്ത് വര്‍മ്മയുടെ ബംഗ്ലാവിനുള്ളില്‍ പണം കണ്ടെത്തിയ സംഭവത്തില്‍ കോടതിയുടെ നിലപാടിനെയും ഉപരാഷ്ട്രപതി വിമര്‍ശിച്ചു. ‘മാര്‍ച്ച് 14, 15 തീയതികളില്‍ ന്യൂഡല്‍ഹിയിലെ ഒരു ജഡ്ജിയുടെ വസതിയില്‍ ഒരു സംഭവം നടന്നു. ഏഴ് ദിവസത്തേക്ക് ആരും അതേക്കുറിച്ച് അറിഞ്ഞില്ല .അത്തരമൊരു കാലതാമസം ന്യായീകരിക്കാവുന്നതാണോ എന്നും അത് അടിസ്ഥാനപരമായ ആശങ്കകള്‍ ഉയര്‍ത്തുന്നുണ്ടോ എന്നും അദ്ദേഹം ചോദിച്ചു.
പണം പിടിച്ചെടുത്തതിന് ശേഷം ജഡ്ജിക്കെതിരെ എഫ്ഐആര്‍ ഫയല്‍ ചെയ്തിട്ടില്ലെന്ന് ഉപരാഷ്ട്രപതി പറഞ്ഞു . ‘ഇന്ത്യന്‍ ഭരണഘടന രാഷ്‌ട്രപതിക്കും ഗവര്‍ണര്‍മാര്‍ക്കും മാത്രമേ പ്രോസിക്യൂഷനില്‍ നിന്ന് പ്രതിരോധം നല്‍കിയിട്ടുള്ളൂ. അപ്പോള്‍ നിയമത്തിന് അതീതമായി ജഡ്ജിമാര്‍ എങ്ങനെയാണ് ഈ പ്രതിരോധശേഷി നേടിയത്?’ അദ്ദേഹം ചോദിച്ചു.
ഏത് അന്വേഷണവും എക്‌സിക്യൂട്ടീവിന്റെ പരിധിയില്‍ വരും. മൂന്ന് ജഡ്ജിമാരുടെ ഒരു കമ്മിറ്റി എന്തിനാണ് പണം കണ്ടെത്തിയ കേസ് പരിശോധിക്കുന്നതെന്ന് അദ്ദേഹം ആരാഞ്ഞു.
