ചെന്നൈ: ഗോകുലം ഗോപാലന്റെ ഉടമസ്ഥതയിലുള്ള സ്ഥാപനങ്ങളില്‍ ഇഡി റെയ്ഡ് നടന്നതിന് പിന്നാലെ അദ്ദേഹത്തെ ഇഡി ചോദ്യം ചെയ്യുന്നു. ചെന്നൈ കോടമ്പാക്കത്തെ ഗോകുലം ചിറ്റ്‌സ് ആന്‍ഡ് ഫിനാന്‍സ് കോര്‍പ്പറേറ്റ് ഓഫീസിലാണ് ഗോകുലം ഗോപാലനെ ചോദ്യം ചെയ്യുന്നത്.
റെയ്ഡില്‍ ലഭ്യമായ വിവരങ്ങളില്‍ വ്യക്തത തേടി ഗോകുലം ഗോപാലനെ ചെന്നൈയിലേക്ക് ഇഡി ഉദ്യോഗസ്ഥര്‍ വിളിപ്പിക്കുകയായിരുന്നു.തുടര്‍ന്ന് കോഴിക്കോട് നിന്നും വൈകിട്ട് ആറരയോടെ ഗോകുലം ഗോപാലന്‍ ചെന്നൈയിലെത്തി. കോടമ്പാക്കത്തെ ഓഫീസില്‍ രാവിലെ മുതല്‍ റെയ്ഡ് നടത്തിയിരുന്നു.
രാവിലെ കോഴിക്കോട് ഇഡി ഉദ്യോഗസ്ഥര്‍ ഗോകുലം ഗോപാലനില്‍ നിന്ന് വിവരം തേടിയിരുന്നു. കോഴിക്കോട്ടെ ഗോകുലം ഗ്രൂപ്പിന്റെ ഓഫീസിലും ഇഡി പരിശോധന നടന്നു.സ്വകാര്യ വാര്‍ത്താ ചാനലിന്റെ ഡയറക്ടര്‍ ബോര്‍ഡ യോഗം നടക്കുന്നതിനാല്‍ ഗോകുലം ഗോപാലന്‍ ഇവിടെ ഉണ്ടായിരുന്നു.
ചെന്നൈയിലെ ഓഫിസിലും വീട്ടിലും ഇഡി പരിശോധന നടത്തി. കോടമ്പാക്കത്ത് ഗോകുലം ചിറ്റ്‌സ് ആന്‍ഡ് ഫിനാന്‍സിന്റെ കോര്‍പറേറ്റ് ഓഫീസിലും നീലാങ്കരയിലെ ഗോപാലന്റെ ഓഫിസിലും ആണ് പരിശോധന നടുന്നത്. പിഎംഎല്‍എ, ഫെമ ചട്ട ലംഘനങ്ങളിലാണ് അന്വേഷണമെന്നാണ് വിവരം. വിദേശനാണ്യ വിനിമയ ചട്ട ലംഘനവുമായി ബന്ധപ്പെട്ട ആദായ നികുതി വകുപ്പ് അന്വേഷണങ്ങളുടെ തുടര്‍ച്ചയായാണ് പരിശോധനയെന്നാണ് അറിയുന്നത്.
