ന്യൂദല്‍ഹി: ബംഗാളിലെ മമത സര്‍ക്കാരിന് വീണ്ടും തിരിച്ചടി. അഴിമതിയുണ്ടെന്ന് കണ്ടെത്തിയതിനെ തുടര്‍ന്ന് അദ്ധ്യാപക നിയമനം റദ്ദാക്കിയ ഹൈക്കോടതി നടപടി സുപ്രീംകോടതിയും ശരിവെച്ചു.
2016ലെ 25,000ലേറെ അദ്ധ്യാപക- അനദ്ധ്യാപക ജീവനക്കാരുടെ നിയമനങ്ങള്‍ റദ്ദാക്കിയുള്ള കൊല്‍ക്കത്ത ഹൈക്കോടതി ഉത്തരവാണ്, ചീഫ് ജസ്റ്റിസ് സഞ്ജീവ് ഖന്ന, ജസ്റ്റിസ് പി.വി. സഞ്ജയ് കുമാര്‍ എന്നിവരടങ്ങിയ ബെഞ്ച് ശരിവെച്ചത്. നിയമനം വഞ്ചനയാണെന്നും പരമോന്നത കോടതി ചൂണ്ടിക്കാട്ടി.
‘അദ്ധ്യാപകരുടെ നിയമനവും സേവനവും റദ്ദാക്കാനുള്ള ഹൈക്കോടതിയുടെ തീരുമാനത്തില്‍ ഇടപെടാന്‍ യാതൊരു കാരണവും ഞങ്ങള്‍ കാണുന്നില്ല.’ ബെഞ്ച് പറഞ്ഞു. എന്നാല്‍ നിയമനം കിട്ടിയവര്‍ ഇതുവരെ വാങ്ങിയ ശമ്പളം തിരികെ നല്‌കേണ്ടതില്ല. സുപ്രീം കോടതി പറഞ്ഞു.
2024 ഏപ്രിലിലാണ് 25,573 നിയമനങ്ങള്‍ ഹൈക്കോടതി റദ്ദാക്കിയത്. വഴിവിട്ട് നിയമനം നേടിയവര്‍ ഇതുവരെ വാങ്ങിയ ശമ്പളം 12 ശതമാനം പലിശയടക്കം മടക്കി നല്‍കാനും ഹൈക്കോടതി ഉത്തരവിട്ടിരുന്നു. നിയമനങ്ങളില്‍ അഴിമതി കാട്ടിയ വിദ്യാഭ്യാസമന്ത്രിയായിരുന്ന പാര്‍ത്ഥ ചാറ്റര്‍ജിയെ ഇഡി അറസ്റ്റ് ചെയ്തിരുന്നു. പാര്‍ത്ഥയുടെ സഹായി അര്‍പ്പിത മുഖര്‍ജിയുടെ വീട്ടില്‍ നിന്ന് 21 കോടിയുടെ നോട്ടുകെട്ടുകളും ഒരു കോടിയുടെ സ്വര്‍ണവും ഇഡി കണ്ടെടുക്കുകയും ചെയ്തിരുന്നു.
