തിരുവനന്തപുരം: കേസില് കോടതി തീരുമാനം വരുന്നത് വരെ മുകേഷ് എംഎല്എ സ്ഥാനത്ത് തുടരുമെന്ന് സിപിഎം സംസ്ഥാന സെക്രട്ടറി എം വി ഗോവിന്ദന്. ആരെങ്കിലും പ്രഖ്യാപിച്ചത് കൊണ്ട് കാര്യമില്ലെന്നും കോടതിയാണ് തീരുമാനിക്കേണ്ടതെന്നും അപ്പോള് ആലോചിക്കാമെന്നുമാണ് അദ്ദേഹം പറഞ്ഞത്.
ലൈംഗിക പീഡനപരാതിയില് നടനും ഭരണകക്ഷി എംഎല്എയുമായ മുകേഷിനെതിരേ പ്രത്യേക അന്വേഷണ സംഘം കുറ്റപത്രം സമര്പ്പിച്ചതിനു പിന്നാലെയാണ് പ്രസ്താവന. മുകേഷിനെതിരായി ഉയര്ന്ന എല്ലാ ആരോപണങ്ങളും തെളിഞ്ഞുവെന്നും ഡിജിറ്റല് തെളിവുകള് ഉള്പ്പെടെ ലഭിച്ചിട്ടുണ്ടെന്നുമാണ് കുറ്റപത്രം. എറാണാകുളം ഫസ്റ്റ് ക്ലാസ് ജുഡീഷ്യല് മജിസ്ട്രേറ്റ് കോടതിയിലാണ് പ്രത്യേക അന്വേഷണസംഘം കുറ്റപത്രം സമര്പ്പിച്ചിരിക്കുന്നത്.
ആലുവ സ്വദേശിയായ നടി 2024 ഓഗസ്റ്റ് 29-നാണ് മുകേഷിനെതിരെ പരാതി നല്കിയത്. പരാതിയുടെ അടിസ്ഥാനത്തില് ഓഗസ്റ്റ് 30-ന് കേസ് രജിസ്റ്റര് ചെയ്യുകയും ചെയ്തിരുന്നു. സിനിമയില് അവസരം വാഗ്ദാനം ചെയ്തും അമ്മയില് അംഗത്വം നല്കാമെന്ന് ഉറപ്പുനല്കിയും തന്നെ ലൈംഗികമായി ഉപയോഗിക്കുകയായിരുന്നു എന്നാണ് മുകേഷ് എം.എല്.എയ്ക്കെതിരായി നല്കിയ പരാതി. 2010-ലാണ് കേസിനാസ്പദമായ സംഭവമുണ്ടാകുന്നത്.
സംഭവത്തിന്റെ കാലപ്പഴക്കം കേസില് വെല്ലുവിളിയാകുമെന്ന വിലയിരുത്തലുകള് ഉണ്ടായിരുന്നുവെങ്കിലും ഡിജിറ്റല് തെളിവുകള് ഉള്പ്പെടെ ശേഖരിക്കാന് പോലീസിന് സാധിച്ചുവെന്നാണ് റിപ്പോര്ട്ട്. ഇ-മെയില് സന്ദേശങ്ങളും വാട്സ്ആപ്പ് ചാറ്റുകളും പരാതിക്കാരുമായി മുകേഷ് ഒരുമിച്ച് യാത്ര ചെയ്തതിന്റെ സാഹചര്യ തെളിവുകളും ഇവരെ ഒരുമിച്ചുകണ്ട സാക്ഷികളുടെ മൊഴികളും ഉള്പ്പെടെയുള്ള തെളിവുകളാണ് അന്വേഷണ സംഘത്തിന് ലഭിച്ചിട്ടുള്ളതെന്നാണ് റിപ്പോര്ട്ട്.
