കൊച്ചി :നിലവിലുള്ള ചട്ടത്തില്‍ ഇളവ് നല്‍കി മൂന്നാറില്‍ കെഎസ്ആര്‍ടിസി ഡബിള്‍ ഡെക്കര്‍ ബസ് ഓടിക്കുന്നതിനെതിരെ ഹൈക്കോടതി സ്വമേധയാ കേസെടുത്തു.വാഹനം രൂപമാറ്റം വരുത്തുന്നതിന് സര്‍ക്കാര്‍ പ്രത്യേക ഉത്തരവ് ഇറക്കുകയായിരുന്നു. ഇത് പ്രകാരമാണ് മൂന്നാറില്‍ കെഎസ്ആര്‍ടിസി ഡബിള്‍ ഡെക്കര്‍ ബസ് ടൂറിസ്റ്റുകള്‍ക്കായി ഓടിക്കുന്നത്. സ്വകാര്യ ബസ്സുകള്‍ രൂപമാറ്റം വരുത്തി സര്‍വീസ് നടത്തിയാല്‍ ഉടമയെയും ബോഡി ബില്‍ഡറെയും അടക്കം പ്രോസിക്യൂട്ട് ചെയ്യാന്‍ നടപടി വേണം. കോടതി നിര്‍ദേശപ്രകാരം തന്നെ ഒരു ടൂറിസ്റ്റ് ബസ്സില്‍ നിന്ന് രണ്ട് ലക്ഷത്തോളം രൂപ കഴിഞ്ഞ ദിവസം പിഴ ഈടാക്കിയിരുന്നു.ഈ സാഹചര്യത്തില്‍ കെഎസ്ആര്‍ടിസിക്ക് വേണ്ടി മാത്രം ഇളവുനല്‍കിയുള്ള സര്‍ക്കാരിന്റെ ഉത്തരവ് എന്ത് അധികാരത്തിലാണെന്ന് ഹൈക്കോടതി ആരാഞ്ഞു. ഇക്കാര്യത്തില്‍ വിശദീകരണം നല്‍കാന്‍ ജസ്റ്റിസ് അനില്‍ കെ നരേന്ദ്രന്‍, ജസ്റ്റിസ് മുരളീകൃഷ്ണ എന്നിവര്‍ ഉള്‍പ്പെട്ട ബെഞ്ച് സര്‍ക്കാരിന് നിര്‍ദ്ദേശം നല്‍കി.
