ന്യൂഡൽഹി : ഉസ്‌ബെക്കിസ്താന്‍ ഗ്രാന്‍ഡ് മാസ്റ്റര്‍ നോദിര്‍ബെക്ക് യാകുബ്ബോവ് ഇന്ത്യന്‍ ഗ്രാന്‍ഡ് മാസ്റ്റര്‍ ആര്‍. വൈശാലിക്ക് ഹസ്തദാനം നല്‍കാന്‍ വിസമ്മതിച്ചതിനെച്ചൊല്ലിയുള്ള വിവാദത്തില്‍ പഴയ ചിത്രം കുത്തിപ്പൊക്കി സോഷ്യല്‍ മീഡിയ. നെതര്‍ലന്‍ഡ്‌സിലെ വിക് ആന്‍ സീയില്‍ നടക്കുന്ന ടാറ്റ സ്റ്റീല്‍ മാസ്റ്റേഴ്‌സ് ചെസ് ടൂര്‍ണമെന്റിനിടെയായിരുന്നു സംഭവം.
ചെസ് മത്സരം തുടങ്ങുന്നതിന് മുന്നോടിയായി വൈശാലി കൈനീട്ടിയെങ്കിലും നോദിർബെക് യാക്കുബോയെവ് ഒഴിഞ്ഞു മാറുകയായിരുന്നു. യാക്കുബോയെവിനെതിരായ നാലാം റൗണ്ട് മത്സരത്തിനു മുന്നോടിയായാണ് വൈശാലി കൈനീട്ടിയത്. എന്നാല്‍ അത് സ്വീകരിക്കാതെ യാക്കുബോയെവ് തന്റെ കസേരയിൽ ഇരുന്നു. ദൃശ്യങ്ങള്‍ സമൂഹ മാധ്യമങ്ങളില്‍ പ്രചരിച്ചതോടെ വിവാദമായി.
മതപരമായ കാരണങ്ങളാലാണ് വൈശാലിക്ക് ഹസ്തദാനം നൽകാതിരുന്നത് എന്നാണ് യാക്കുബോയെവിന്റെ വിശദീകരണം.എന്നാല്‍ 2023ല്‍ നടന്ന അബുദാബി ചെസ് ടൂര്‍ണമെന്‍റില്‍, ഇന്ത്യന്‍ വനിതാ ചെസ്താരം ദിവ്യ ദേശ്മുഖിന് നോദിര്‍ബെക്ക് യാകുബ്ബോവ് കൈകൊടുക്കുന്ന ചിത്രമാണ് സോഷ്യല്‍ മീഡിയ കുത്തിപ്പൊക്കിയത്. ഈ ചിത്രം പുറത്തു വന്നതോടെ, നോദിര്‍ബെക്ക് യാകുബ്ബോവിന്റെ ന്യായീകരണം പൊളിഞ്ഞുവെന്നാണ് കമന്‍റുകള്‍.
