കൊച്ചി: വെടിക്കെട്ടിന് കര്‍ശന നിബന്ധനകള്‍ ഏര്‍പ്പെടുത്തിയുളള കേന്ദ്ര വിജ്ഞാപനത്തിനെതിരെ തിരുവമ്പാടി, പാറമേക്കാവ് ദേവസ്വങ്ങള്‍ ഹൈക്കോടതിയില്‍. കേന്ദ്ര സര്‍ക്കാരിന്റെ വാണിജ്യ വ്യവസായ വകുപ്പില്‍ നിന്ന് നിന്ന് ഒക്ടോബര്‍ പതിനൊന്നിന് ഇറക്കിയ ഗസറ്റ് വിജ്ഞാപനം റദ്ദാക്കണമെന്നാണ് റിട്ട് ഹര്‍ജിയിലെ ആവശ്യം.
കേന്ദ്ര വിജ്ഞാപനത്തിലെ നിബന്ധനകള്‍ കാരണമാണ് വേല വെടിക്കെട്ടിന് ഇപ്പോള്‍ അനുമതി നിഷേധിച്ചത്. 2006ലെ സ്‌ഫോടക വസ്തു നിയമത്തിലെ വ്യവസ്ഥകള്‍ക്ക് വിരുദ്ധമാണ് ഗസറ്റിലുള്ളതെന്നും ദേവസ്വങ്ങള്‍ ഹര്‍ജിയില്‍ പറയുന്നു. ജനുവരി മൂന്നിനാണ് പാറമേക്കാവിന്റെ വേല നടക്കേണ്ടത്. തിരുവമ്പാടിയുടെ വേല ജനുവരി അഞ്ചിനും.
പുതിയ കേന്ദ്ര സ്‌ഫോടക വസ്തു ചട്ട നിയമമനുസരിച്ച് ജനങ്ങളുടെ ജീവനും സ്വത്തിനും അപകടകരമല്ലാത്ത വിധം വെടിക്കെട്ട് നടത്തുന്നതിനുള്ള ഭൗതിക സാഹചര്യം ഇല്ലെന്ന് കാട്ടിയാണ് ജില്ലാ കളക്ടര്‍ വേല വെടിക്കെട്ടിന് അനുമതി നിഷേധിച്ചത്.
തൃശൂര്‍ പൂരം വെടിക്കെട്ട് നടക്കുന്ന തേക്കിന്‍കാട് മൈതാനിയിലാണ് വേല വെടിക്കെട്ടും നടക്കാറുള്ളത്. ഇവിടെ വെടിക്കെട്ട് സാമഗ്രികള്‍ സൂക്ഷിക്കുന്ന പുരയും വെടിക്കെട്ട് നടക്കുന്ന സ്ഥലവും തമ്മില്‍ 78 മീറ്റര്‍ മാത്രമാണ് ദൂരം.ഇതാണ് അനുമതി നിഷേധിക്കാന്‍ കാരണം. പുതിയ നിയമമനുസരിച്ച് 200 മീറ്റര്‍ ദൂരമാണ് വേണ്ടത്.വിവിധ വകുപ്പുകളുടെ റിപ്പോര്‍ട്ട് കണക്കിലെടുത്താണ് ദേവസ്വങ്ങളുടെ അപേക്ഷ കളക്ടര്‍ നിഷേധിച്ചത്.
