തിരുവനന്തപുരം: വനിതാ ക്രിക്കറ്റിലെ വയനാടന്‍ താരോദയം ജോഷിത വി.ജെ. ഐസിസി അണ്ടര്‍ 19 ടി 20 വേള്‍ഡ് കപ്പ് ടീമില്‍ ഇടം നേടി. മിന്നു മണിക്കും സജന സജീവനും സി.എം.സി. നജ്‌ലയ്‌ക്കും പിന്നാലെ കേരള ക്രിക്കറ്റ് അസോസിയേഷന്റെ കൃഷ്ണഗിരി വനിതാ ക്രിക്കറ്റ് അക്കാദമിയില്‍നിന്നുള്ള പുത്തന്‍ താരോദയം കൂടിയാണ് ജോഷിത.വരുന്ന അടുത്ത മാസം മലേഷ്യയിലാണ് മത്സരങ്ങള്‍.
19ന് നടക്കുന്ന മത്സരത്തില്‍ വെസ്റ്റിന്‍ഡീസിനെതിരെയാണ് ഭാരതത്തിന്റെ ആദ്യകളി. അടുത്തിടെ ജേതാക്കളായ പ്രഥമ അണ്ടര്‍ 19 ഏഷ്യാ കപ്പിലെ ഭാരത ടീമിലും ജോഷിത അംഗമായിരുന്നു. വരാനിരിക്കുന്ന വനിതാ പ്രീമിയര്‍ ലീഗിലെ ബെംഗളൂരു റോയല്‍ ചാലഞ്ചേഴ്‌സ് ടീമില്‍ കൂടി തെരഞ്ഞെടുക്കപ്പെട്ടിട്ടുണ്ട്.
കല്‍പ്പറ്റ സ്വദേശിയായ ജോഷിത കഴിഞ്ഞ ഏഴു വര്‍ഷമായി കൃഷ്ണഗിരി ക്രിക്കറ്റ് അക്കാദമിയിലാണ് പരിശീലിക്കുന്നത്. കേരളത്തിന്റെ അണ്ടര്‍ 19 ടീം ക്യാപ്റ്റന്‍ കൂടിയാണ് ജോഷിത. സുല്‍ത്താന്‍ ബത്തേരി സെന്റ് മേരീസ് കോളജിലെ ഒന്നാംവര്‍ഷ ബിരുദ വിദ്യാര്‍ഥിനിയാണ്. കല്പറ്റ മൈതാനി ഗ്രാമത്തുവയല്‍ ജോഷിയുടെയും ശ്രീജയുടെയും മകളാണ്.
അണ്ടര്‍ 19 ട്വന്റി20 ലോകകപ്പിനുള്ള ഭാരത ടീം: നിക്കി പ്രസാദ് (ക്യാപ്റ്റന്‍), സനിക ചക്ലെ, ജി. ത്രിഷ, കമാലിനി ജി. (വൈസ് ക്യാപ്റ്റന്‍), ഭാവിക അഹിരെ, ഈശ്വരി അവസരെ, ജോഷിത വി.ജെ., സോനം യാദവ്, പരുണിക സിസോദിയ, കേസരി ധൃതി, ആയുഷി ശുക്ല, ആനന്ദിതാ കിഷോര്‍, എം.ടി. ശബ്‌നം, വൈഷ്ണവി എസ്.
