ന്യൂദല്‍ഹി:: സ്ത്രീശാക്തീകരണത്തിലേക്ക് ഒരു ചുവടു കൂടിവെച്ച് പ്രധാനമന്ത്രി മോദി. സ്ത്രീകളെ സാമ്പത്തികമായി സ്വന്തം കാലില്‍ നില്‍ക്കാന്‍ പ്രാപ്തരാക്കുക എന്ന ഉദ്ദേശ്യത്തോടെയാണ് എല്‍ഐസിയുടെ ഭീമാ സഖി യോജന എന്ന പദ്ധതി പ്രധാനമന്ത്രി മോദി ഉദ്ഘാടനം ചെയ്തത്.
അടുത്ത 12 മാസങ്ങള്‍ക്കുള്ളില്‍ ഒരു ലക്ഷം സ്ത്രീകളെ ഭീമാ സഖി യോജനയുടെ ഭാഗമാക്കുകയാണ് ലക്ഷ്യം. മൂന്ന് വര്‍ഷത്തില്‍ രണ്ട് ലക്ഷം സ്ത്രീകളെ ഭീമാ സഖികളാക്കുമെന്ന് മോദി പറഞ്ഞു. ഇവര്‍ക്ക് മൂന്ന് വര്‍ഷം മാസം തോറും ഒരു തുക സ്റ്റൈപ്പന്‍റായി ലഭിയ്‌ക്കും. ഒന്നാമത്തെ വര്‍ഷം മാസം തോറും ഏഴായിരം രൂപ വീതവും രണ്ടാമത്തെ വര്‍ഷം മാസം തോറും ആറായിരും രൂപ വീതവും മൂന്നാം വര്‍ഷം മാസംതോറും അയ്യായിരം രൂപ വീതവും സ്ത്രീകള്‍ക്ക് ലഭിക്കും.
18 മുതല്‍ 70 വയസ്സുവരെയുള്ള സ്ത്രീകള്‍ക്കാണ് ഈ പദ്ധതിയില്‍ ഭാഗമാകാന്‍ കഴിയുക. പത്താം ക്ലാസ് പാസായിരിക്കണം എന്നതാണ് യോഗ്യത. ഈ സ്ത്രീകള്‍ക്ക് എല്‍ ഐസി തന്നെ ആവശ്യമായ പരിശീലനം നല്‍കും. ഇതിനായി എല്‍ഐസി 840 കോടി രൂപ നീക്കിവെയ്‌ക്കുമെന്ന് എല്‍ഐസി അധ്യക്ഷന്‍ സിദ്ധാര്‍ത്ഥ മൊഹന്തി പറഞ്ഞു. പക്ഷെ പിന്നീട് ഭീമാ സഖി എന്നറിയപ്പെടുന്ന ഈ സ്ത്രീകള്‍ ഒരു വര്‍ഷം 12 എല്‍ഐസി പോളിസികളെങ്കിലും വില്‍ക്കുന്നവരാകുമെന്നും അത് എല്‍ഐസിക്ക് ഇപ്പോള്‍ മുടക്കുന്ന തുകയുടെ നാലോ അഞ്ചോ ഇരട്ടിയായി തിരിച്ചുനല്‍കുമെന്നും സിദ്ധാര്‍ത്ഥ മൊഹന്തി പറഞ്ഞു. .
