തിരുവനന്തപുരം: 29-ാമത് അന്താരാഷ്ട്ര ചലച്ചിത്ര മേളയ്ക്ക് നാളെ തുടക്കമാകും. വൈകിട്ട് 6ന് തിരുവനന്തപുരം നിശാഗന്ധി ഓഡിറ്റോറിയത്തില് മുഖ്യമന്ത്രി പിണറായി വിജയന് ഉദ്ഘാടനം ചെയ്യും. അഭിനയ രംഗത്ത് അമ്പതാണ്ട് പൂര്ത്തിയാക്കുന്ന ഷബാന ആസ്മിയെ ഉദ്ഘാടന ചടങ്ങില് ആദരിക്കും. ഹോങ്കോങ്ങില്നിന്നുള്ള സംവിധായിക ആന് ഹുയിക്ക് ലൈഫ്ടൈം അച്ചീവ്മെന്റ് പുരസ്കാരം സമ്മാനിക്കും.
നാളെ മുതല് 20 വരെ 15 തിയറ്ററുകളിലായി നടക്കുന്ന മേളയില് 68 രാജ്യങ്ങളില് നിന്നുള്ള 177 സിനിമകള് പ്രദര്ശിപ്പിക്കും. അന്താരാഷ്ട്ര മേളകളില് പ്രേക്ഷകപ്രീതി നേടിയ 13 ചിത്രങ്ങളടങ്ങിയ ഫെസ്റ്റിവല് ഫേവറിറ്റ്സ് ആകര്ഷണമായിരിക്കും. അര്മേനിയന് സിനിമാ ശതാബ്ദിയുടെ ഭാഗമായി ഏഴ് ചിത്രങ്ങള് കണ്ട്രി ഫോക്കസ് വിഭാഗത്തില് പ്രദര്ശിപ്പിക്കും.
ദക്ഷിണ കൊറിയന് സംവിധായകന് ഹോങ് സാങ് സൂ, ഷബാന ആസ്മി, ഛായാഗ്രാഹകന് മധു അമ്പാട്ട് എന്നിവരുടെ റെട്രോസ്പെക്റ്റീവ്, ‘ദ ഫീമേല് ഗെയ്സ്’ എന്ന പേരില് വനിതാ സംവിധായകരുടെ ചിത്രങ്ങളുടെ പാക്കേജ്, ലാറ്റിനമേരിക്കന് സിനിമകളുടെ പാക്കേജ്, കലൈഡോസ്കോപ്പ്, മിഡ്നൈറ്റ് സിനിമ, ആനിമേഷന് ചിത്രങ്ങള്, ചലച്ചിത്ര അക്കാദമി പുനരുദ്ധരിച്ച രണ്ടു ചിത്രങ്ങള് ഉള്പ്പെടെയുള്ള റീസ്റ്റോര്ഡ് ക്ലാസിക്സ് എന്നിവയുണ്ടാകും. പി. ഭാസ്കരന്, പാറപ്പുറത്ത്, തോപ്പില്ഭാസി എന്നിവരുടെ ജന്മശതാബ്ദിയോടനുബന്ധിച്ച് ‘ലിറ്റററി ട്രിബ്യൂട്ട്’ വിഭാഗത്തില് മൂന്നു ചിത്രങ്ങളും പ്രദര്ശിപ്പിക്കും.
പതിമൂവായിരത്തില്പ്പരം പ്രതിനിധികള് പങ്കെടുക്കുന്ന മേളയില് നൂറോളം ചലച്ചിത്ര പ്രവര്ത്തകര് അതിഥികളായെത്തും. മേളയുടെ ഭാഗമായി ഓപ്പണ്ഫോറം, ഇന് കോണ്വര്സേഷന്, മീറ്റ് ദ ഡയറക്ടര്, അരവിന്ദന് സ്മാരക പ്രഭാഷണം, പാനല് ചര്ച്ചകള് എന്നിവയും നടക്കും. സംവിധായിക പായല് കപാഡിയയ്ക്കുള്ള സ്പിരിറ്റ് ഓഫ് സിനിമ അവാര്ഡ് 20ന് സമ്മാനിക്കും.
