കൊച്ചി: തീപ്പിടിത്തമുണ്ടാകുമ്പോള് അഗ്നിജ്വാലകളുടെ ഹീറ്റ് ഫ്ളക്സ് മാപ്പുകള് സൃഷ്ടിച്ച് അപകടമേഖലകളെ മാര്ക്ക് ചെയ്യുകയും അതുവഴി സുരക്ഷിതമായി ആളുകളെ ഒഴിപ്പിക്കാന് സഹായിക്കുകയും ചെയ്യുന്ന സാങ്കേതികവിദ്യക്ക് പേറ്റന്റ് നേടി കൊച്ചി ശാസ്ത്ര സാങ്കേതിക സര്വകലാശാല. എഐ പവേര്ഡ് ഡിവൈസ് ഫോര് റേഡിയന്റ് ഹീറ്റ് ഫഌക്സ് പ്രെഡിക്ഷന് ആന്ഡ് ത്രെട്ട് ഏരിയ മാപ്പിംഗ് ബേസ്ഡ് ഓണ് ഇമേജസ്’ എന്ന സാങ്കേതികവിദ്യ സൃഷ്ടിച്ചത് ഗവേഷകരായ ഡോ. പ്രവീണ് വിജയന്, ഡോ. സ്വാതി ബി. ശശീന്ദ്രന്, ഡോ. ശൈലേഷ് ശിവന്, സ്കൂള് ഓഫ് എന്ജിനീയറിങ് പ്രൊ
ഫസര് ഡോ. ഗിരീഷ്കുമാരന് തമ്പി എന്നിവരാണ്.
അഗ്നിരക്ഷാ പ്രവര്ത്തനങ്ങള് ത്വരിതപ്പെടുത്തുകയും കൂടുതല് സുരക്ഷിതമാക്കുകയും ചെയ്യുന്ന ഈ സാങ്കേതിക ഉപകരണം അപകടമേഖലകളെ തിരിച്ചറിയുകയും സന്ദര്ഭത്തിനനുസരിച്ച് ആളുകളെ ഒഴിപ്പിക്കാനുള്ള ഏറ്റവും മികച്ച മാര്ഗം അവലംബിക്കാന് സഹായിക്കുകയും കൂടുതല് വലിയ തീപ്പിടിത്തം ഒഴിവാക്കാനുള്ള സാധ്യതകള് നിരത്തി അപകടസാധ്യതാ വിശകലനം, അടിയന്തര പ്രതികരണം, എന്നിവയില് വലിയ പങ്കുവഹിക്കുകയും ചെയ്യും.
ബെംഗളൂരുവിലെ ഫയര് ആന്ഡ് കമ്പസ്റ്റ്യന് ഗവേഷണ കേന്ദ്രവുമായി അഫിലിയേറ്റ് ചെയ്തിട്ടുള്ള അക്കാദമീഷ്യനും ഗവേഷകനുമായ ഡോ. പ്രവീണ്, ജെറ്റ് ഫയര് മോര്ഫോളജി വിശകലനത്തിലും നിര്മിതബുദ്ധിയുടെ സഹായത്തോടെ അഗ്നിയുടെ ഹീറ്റ് ഫഌക്സ് പ്രവചിക്കുന്നതിനുള്ള വൈദഗ്ധ്യവുമുള്ള ആളാണ്. കുസാറ്റില് നിന്ന് പിഎച്ച്ഡി നേടിയ ഇദ്ദേഹം സ്പെയിനില് നടന്ന യൂറോപ്യന് സിമ്പോസിയം ഫോര് ഫയര് സേഫ്റ്റി സയന്സ് ഉള്പ്പെടെ വിവിധ അന്താരാഷ്ട്ര പ്ലാറ്റ്ഫോമുകളില് പ്രബന്ധങ്ങളവതരിപ്പിച്ചിട്ടുണ്ട്. കുസാറ്റില് നിന്ന് പിഎച്ച്ഡി നേടിയ ഗവേഷകയായ ഡോ. സ്വാതി, ഊര്ജ സംഭരണ വെല്ലുവിളികള് നേരിടുന്നതിനും ഹൈഡ്രജന് ഊര്ജ ഉല്പ്പാദനം മെച്ചപ്പെടുത്തുന്നതിനും ധാരാളം സംഭാവനകള് നല്കിയിട്ടുണ്ട്.
ആര്ട്ടിഫിഷ്യല് ഇന്റലിജന്സ് ഉള്പ്പെടെ ഉയര്ന്നുവരുന്ന സാങ്കേതികവിദ്യകളുടെ മേഖലകളില് വിദഗ്ധയുമാണ്.
സാങ്കേതിക-വിദ്യാഭ്യാസ വിചക്ഷണനും, ഗവേഷകനുമായ ഡോ. ശൈലേഷ് ശിവന് അക്കാദമിക, വ്യവസായ മേഖലകളില് ആര്ട്ടിഫിഷ്യല് ഇന്റലിജന്സ്, ഡാറ്റാ സയന്സ് അനുഭവസമ്പത്തുള്ളയാളാണ്. ഡോ. ഗിരീഷ് കുമാരന് തമ്പി ബിഎസ് കുസാറ്റിലെ സ്കൂള് ഓഫ് എന്ജിനീയറിംഗിലെ മെക്കാനിക്കല് എന്ജിനീയറിങ് പ്രൊഫസറാണ്.
