ദുബായ്: ഐസിസിയുടെ ഏറ്റവും പുതിയ ടെസ്റ്റ് ബാറ്റിങ് റാങ്കിങ്ങില് ഭാരത ഓപ്പണര് യശസ്വി ജയ്സ്വാളിന് തിരിച്ചടി. ബോര്ഡര്-ഗാവസ്കര് ട്രോഫിയിലെ ആദ്യ ടെസറ്റിലെ സെഞ്ചുറിയോടെ രണ്ടാം സ്ഥാനത്തേക്ക് ഉയര്ന്ന യശസ്വിയെ നാലാം സ്ഥാനത്തേക്ക് പിന്തള്ളി പുതിയ റാങ്കിങ്ങില് ഇംഗ്ലണ്ട് താരം ഹാരി ബ്രൂക്ക് രണ്ടാമതെത്തി.
ന്യൂസിലന്ഡിനെതിരായ ടെസ്റ്റില് 171 റണ്സടിച്ച ഇന്നിങ്സാണ് ബ്രൂക്കിന് നേട്ടമായത്. ഇംഗ്ലണ്ട് താരം ജോ റൂട്ട് ഒന്നാം സ്ഥാനത്ത് തുടരുന്ന ബാറ്റിംഗ് റാങ്കിങ്ങില് ന്യൂസിലന്ഡ് താരം കെയ്ന് വില്യംസണ് ആണ് മൂന്നാമത്.
ആറാം സ്ഥാനത്തുള്ള റിഷഭ് പന്താണ് ആദ്യ പത്തിലുള്ള മറ്റൊരു ഭാരത താരം. പെര്ത്തില് സെഞ്ചുറി നേടിയെങ്കിലും വിരാട് കോഹ്ലി ഒരു സ്ഥാനം നഷ്ടപ്പെടുത്തി പതിനാലാമതാണ്. പതിനെട്ടാം സ്ഥാനത്തുള്ള ശുഭ്മാന് ഗില്ലാണ് ആദ്യ ഇരുപതിലുള്ള മറ്റൊരു ഭാരത താരം.
ടെസ്റ്റ് ബൗളിംഗ് റാങ്കിംഗില് ജസ്പ്രീത് ബുംറ ഒന്നാം സ്ഥാനം നിലനിര്ത്തിയപ്പോള് കാഗിസോ റബാഡ രണ്ടാമതും ജോഷ് ഹോസല്വുഡ് മൂന്നാമതുമാണ്. പെര്ത്തില് കളിച്ചില്ലെങ്കിലും അശ്വിന് നാലാം സ്ഥാനം നിലനിര്ത്തിയപ്പോള് രവീന്ദ്ര ജഡേജ ഒരു സ്ഥാനം മെച്ചപ്പെടുത്തി ആറാമതായി.
ടെസ്റ്റ് ഓള് റൗണ്ടര്മാരുടെ റാങ്കിംഗില് രവീന്ദ്ര ജഡേജ ഒന്നാം സ്ഥാനം നിലനിര്ത്തിയപ്പോള് 10 സ്ഥാനങ്ങള് ഉയര്ന്ന ദക്ഷിണാഫ്രിക്കയുടെ മാര്ക്കോ യാന്സന് അശ്വിനെ പിന്തള്ളി രണ്ടാം സ്ഥാനത്തെത്തി. ശ്രീലങ്കക്കെതിരായ ഓള് റൗണ്ട് പ്രകടനമാണ് യാന്സന് നേട്ടമായത്. അശ്വിന് മൂന്നാമതാണ്. അക്സര് പട്ടേല് എട്ടാം സ്ഥാനത്തുണ്ട്.
