ശബരിമല: ശബരിമലയില്‍ തമിഴ് നടന്‍ അജിതിന് വേണ്ടി പോസ്റ്റര്‍ ഉയര്‍ത്തി അജിതിന്റെ ഫാന്‍സ് സംഘം. ഒപ്പം അജിതേ, കടവുളേ (ദൈവം) എന്നീ മുദ്രാവാക്യങ്ങളും അവര്‍ മുഴക്കി. ഈ മണ്ഡലക്കാലത്താണ് സംഭവം. ചില തമിഴ് വെബ്സൈറ്റുകളില്‍ ഇതിന്റെ ഫോട്ടോകള്‍ പ്രചരിച്ചതോടെ ഇതേക്കുറിച്ച് അന്വേഷിക്കുമെന്ന് ശബരിമല ദേവസ്വം ബോര്‍ഡ് അറിയിച്ചു.
കഴിഞ്ഞ ദിവസമാണ് അജിതിന്റെ പോസ്റ്ററുമായി ഫാന്‍സ് സംഘം എത്തിയത്. അജിതിന്റെ പുതിയ സിനിമയായ ‘വിടാമുയര്‍ച്ചി’യുടെ ടീസര്‍ ശബരിമലയില്‍ കാണിക്കണമെന്നായിരുന്നു ഫാന്‍സിന്റെ ആവശ്യം. ഈ ആവശ്യം എഴുതിയ പോസ്റ്ററാണ് ഫാന്‍സ് ഉയര്‍ത്തിയത്. ഈ പോസ്റ്റര്‍ പിടിച്ചു നില്‍ക്കുന്ന അജിത് ആരാധകരുടെ ഫോട്ടോ തമിഴ് സമൂഹമാധ്യമങ്ങളില്‍ പലരും പങ്കുവെച്ചതോടെയാണ് വിവാദമായത്.
ഇത്തരത്തില്‍ ശബരിമല ഭൂമിയില്‍ പോസ്റ്റര്‍ ഉയര്‍ത്താനോ മുദ്രാവാക്യം വിളിക്കാനോ നിയമം അനുവദിക്കുന്നില്ല. അതിനാലാണ് ഇക്കാര്യത്തെക്കുറിച്ച് അന്വേഷിക്കുമെന്ന് ശബരിമല ദേവസ്വം ബോര്‍ഡ് പറഞ്ഞു.
