പത്തനംതിട്ട: ശബരിമല മണ്ഡല-മകരവിളക്ക് തീര്ഥാടനത്തോടനുബന്ധിച്ച് കുടിവെള്ള വിതരണം സുഗമമാക്കുന്നതിന് എല്ലാ ക്രമീകരണങ്ങളും പൂര്ത്തിയാക്കിയെന്ന് കേരള വാട്ടര് അതോറിറ്റി. തീര്ഥാടകര്ക്കായി പമ്പ മുതല് സന്നിധാനം വരെ കുടിവെള്ളം സജ്ജീകരിച്ചിട്ടുണ്ട്. എട്ടു സംഭരണികളിലായി ഏകദേശം 68 ലക്ഷം ലിറ്റര് ജലമാണ് സംഭരിക്കുന്നത്. മേഖലയില് താല്ക്കാലിക ടാപ്പുകളും സ്ഥാപിച്ചിട്ടുണ്ട്. ശബരിമലയില് റിവേഴ്സ് ഓസ്മോസിസ്(ആര്ഒ) പ്ലാന്റുകള് വഴി ജലം ശുദ്ധീകരിച്ച് മണിക്കൂറില് 35,000 ലിറ്റര് ശുദ്ധജലം വിതരണം ചെയ്യും. ആര്ഒ പ്ലാന്റുകളില് നിന്നു പൈപ്പുകള് സ്ഥാപിച്ച് 103 കിയോസ്കുകളിലായി 270 ടാപ്പുകള് വഴിയാണ് തീര്ത്ഥാടകര്ക്ക് കുടിവെള്ളം വിതരണം നടത്തുന്നത്. ആവശ്യാനുസരണം കൂടുതല് കിയോസ്കുകള് സ്ഥാപിക്കാനാണ് നീക്കം. നിലയ്ക്കല് ബേസ് ക്യാംപില് വാട്ടര് അതോറിറ്റിയുടെ, മണിക്കൂറില് 1000 ലിറ്റര് ശേഷിയുള്ള 28 ആര്ഒ പ്ലാന്റുകളില് നിന്നുള്ള ജലം വിതരണം നടത്തുന്നതിന് ഏകദേശം 20 കിലോമീറ്റര് പിവിസി പൈപ്പുകള് സ്ഥാപിച്ചിട്ടുണ്ട്. 80 കിയോസ്കുകളില് 226 ടാപ്പുകളും സ്ഥാപിച്ചിട്ടുണ്ട്.
പമ്പ-ശബരിമല ശുദ്ധജല വിതരണ പദ്ധതിയുടെ എല്ലാ ഘടകങ്ങളും പ്രവര്ത്തനസജ്ജമാണെങ്കിലും തീര്ഥാടനകാലത്ത് കൂടുതല് കാര്യക്ഷമമാക്കുന്നതിന് അറ്റകുറ്റപ്പണികള് നടത്തിയിട്ടുണ്ട്. തീര്ഥാടകര്ക്ക് ശുദ്ധജലം വിതരണം നടത്തുന്നതിനായി വാട്ടര് അതോറിറ്റിയുടെ 13 എംഎല്ഡി ഉല്പാദന ശേഷിയുള്ള കുടിവെള്ള പദ്ധതിയാണ് ശബരിമലയിലുള്ളത്. പമ്പാ ത്രിവേണിയിലെ ഇന്ടേക്ക് പമ്പ് ഹൗസില് നിന്ന് പ്രഷര് ഫില്ട്ടര് വഴി ശുദ്ധീകരിക്കുന്ന ജലം, പമ്പ ഭൂതലസംഭരണിയില് ശേഖരിച്ച് ക്ലോറിനേഷന് നടത്തി പമ്പാമേഖലയിലും നീലിമലബോട്ടം പമ്പ് ഹൗസിലും തുടര്ന്ന് നീലിമലടോപ്പ് പമ്പ് ഹൗസ്, അപ്പാച്ചിമേട് പമ്പ് ഹൗസ് വഴി ശരംകുത്തി സംഭരണിയിലും സന്നിധാനം ദേവസ്വം സംഭരണികളിലേക്കും ശേഖരിച്ച് സന്നിധാനത്തും കാനനപാതയിലും ജലവിതരണം ക്രമീകരിച്ചിരിക്കുന്നു.ശബരിമല, പാണ്ടിത്താവളം എന്നിവിടങ്ങളില് ദേവസ്വം ബോര്ഡ് 1.90 എംഎല്ഡി ജലം ഏഴു ടാങ്കുകളിലായി സംഭരിച്ചു വിതരണം നടത്തുന്നുണ്ട്. ദേവസ്വം ബോര്ഡ് കിയോസ്കുകളിലേക്കും ശൗചാലയങ്ങളിലേക്കും മറ്റ് സര്ക്കാര്-അര്ധ സര്ക്കാര്-ദേവസ്വം ബോര്ഡ് സ്ഥാപനങ്ങളിലേക്കും വാട്ടര് അതോറിറ്റിയാണ് ശുദ്ധജലമെത്തിക്കുന്നത്.നിലയ്ക്കലില് 65 ലക്ഷം ലിറ്റര് ജലം സംഭരിക്കുന്നതിനായി ദേവസ്വം ബോര്ഡിന്റെ 40 ലക്ഷം ലിറ്റര് ടാങ്കിന് പുറമെ, കേരള വാട്ടര് അതോറിറ്റി 5 ലക്ഷത്തിന്റെ 3 സ്റ്റീല് ടാങ്കുകളും 5000 ലിറ്ററിന്റെ 215 എച്ച്ഡിപിഇ ടാങ്കുകളും വിവിധ സ്ഥലങ്ങളില് സ്ഥാപിച്ചിട്ടുണ്ട്. പമ്പയില് നിന്ന് ടാങ്കര് ലോറിയില് ദേവസ്വം ബോര്ഡിന്റെ ആവശ്യാനുസരണം കുടിവെള്ളമെത്തിച്ച് വിതരണം ചെയ്യുന്നതാണ് പതിവ്.
ജലം ശുദ്ധീകരിക്കുന്നതിനുവേണ്ടി ത്രിവേണി ഇന്ടേക്ക് പമ്പ് ഹൗസിനോട് ചേര്ന്ന് പ്രഷര് ഫില്ട്ടര് സംവിധാനം സ്ഥാപിച്ചിട്ടുണ്ട്. ഇവിടെ നിന്ന് ശുദ്ധീകരിച്ച ജലം മറ്റു പമ്പ് ഹൗസുകളിലെത്തിച്ച് ഇലക്ട്രോ ക്ലോറിനേഷന് സംവിധാനം വഴി അണുനശീകരണം നടത്തുന്നു. ഈ ജലത്തെ വീണ്ടും റിവേഴ്സ് ഓസ്മോസിസ് പ്ലാന്റ് വഴി ശുദ്ധീകരിച്ച് കിയോസ്കുകളിലൂടെ വിതരണം നടത്തുന്നു. പമ്പയിലെ വാട്ടര് അതോറിറ്റിയുടെ എന്എബിഎല് അക്രഡിറ്റേഷനുള്ള ലബോറട്ടറിയില് കര്ശന പരിശോധന നടത്തിയ ശേഷമാണ് കുടിവെള്ളം വിതരണം നടത്തുന്നത്. ഇന്ടേക്ക് പമ്പ്ഹൗസ് പരിസരത്തേക്ക് ആളുകള് കടന്ന് മാലിന്യം ഉണ്ടാകാതിരിക്കാന് പൊലീസ് സഹായത്തോടെ നിയന്ത്രണങ്ങള് ഏര്പ്പെടുത്തുന്നുണ്ട്. വാട്ടര് കിയോസ്കുകള് കൃത്യമായി വൃത്തിയായി സൂക്ഷിക്കുന്നതിനും ജീവനക്കാരെ നിയമിക്കുമെന്നും വാട്ടര് അതോറിറ്റി അറിയിച്ചു.
