കൊച്ചി: സംസ്ഥാന സ്കൂള് അത്ലറ്റിക്സില് ആദ്യ ഇരട്ട സ്വര്ണവുമായി പാലക്കാടിന്റെ എം. അമൃത്. ഇന്നലെ 800 മീറ്ററിലും പൊന്നണിഞ്ഞാണ് താരം ഇരട്ട സ്വര്ണത്തിന് അര്ഹനായത്. കഴിഞ്ഞ ദിവസം 400 മീറ്ററിലും അമൃത് പൊന്നണിഞ്ഞിരുന്നു. പാലക്കാട് കല്ലടി എച്ച്എസ്എസിലെ പ്ലസ് ടു വിദ്യാര്ഥിയാണ്. 1 മിനിറ്റ് 56.55 സെക്കന്ഡില് ഫിനിഷ് ചെയ്താണ് ഇന്നലെ അമൃത് 800 മീറ്ററില് പൊന്നണിഞ്ഞത്.
ഒരു മിനിറ്റ് 58.48 സെക്കന്ഡില് വയനാട് സിഎസ്എച്ചിലെ സ്റ്റെഫിന് സാലു വെള്ളിയും സായ് കൊല്ലത്തിന്റെ മെല്ബിന് ബെന്നി 1 ഒരുമിനിറ്റ് 59.12 സെക്കന്ഡില് വെങ്കലവും നേടി.
ഇതേവിഭാഗം പെണ്കുട്ടികളില് പാലക്കാട് കൊടുവായൂര് വിഎച്ച്എസിലെ നിവേദ്യ കലാധര് 2 മിനിറ്റ്18.60 സെക്കന്ഡില് പൊന്നണിഞ്ഞു.കൊടുവായൂര് തേങ്കുറിശ്ശി സ്വദേശിയായ ഈ 10-ാം ക്ലാസുകാരി കഴിഞ്ഞ ദിവസം 400 മീറ്ററില് വെങ്കലവും നേടിയിരുന്നു. ഇടുക്കി സിഎച്ച്എസ് കാല്വരിമൗണ്ടിലെ അലീന സജി 2 മിനിറ്റ് 22.611 സെക്കന്ഡില് വെള്ളിയും പെരിന്തല്മണ്ണ പിഎച്ച്എസ്എസിലെ ദിയ ഫാത്തിമ 2 മിനിറ്റ് 24.59 സെക്കന്റില് വെങ്കലവും സ്വന്തമാക്കി.
സീനിയര് ആണ്കുട്ടികളുടെ വിഭാഗത്തില് മലപ്പുറത്തിന്റെ കെ.പി. ലുഖ്മാന് 1:57.14 മിനിറ്റില് ഒന്നാമതെത്തി. രായിരിമംഗലം എസ്എംഎംഎച്ച്എസ്എസിലെ പ്ലസ് ടു വിദ്യാര്ഥിയായ ലുഖ്മാന്, ഡിഗ്രി വിദ്യാര്ഥിയായ മുഹമ്മദ് ഫര്ഷീഖിന്റെ കീഴിലാണ് പരിശീലനം. തിരൂരങ്ങാടി പിഎസ്എംഒ കോളജിലെ മൂന്നാംവര്ഷ ബിരുദവിദ്യാര്ഥിയായ മുഹമ്മദ്, നടത്ത മത്സരങ്ങളിലെ താരമായിരുന്നു.
മലപ്പുറം കിഴുപറമ്പ് സ്കൂളിലെ മുഹമ്മദ് സിദാന് 1:57.79 സെക്കന്ഡില് വെള്ളിയും കണ്ണൂര് കോഴിച്ചാല് ജിവിഎച്ച്എസ്എസിലെ അനികേത്. എം 1:59.13 സെക്കന്ഡില് വെങ്കലവും സ്വന്തമാക്കി.
പെണ്കുട്ടികളുടെ വിഭാഗത്തില് കടകശ്ശേരി ഐഡിയല് സ്കൂളിലെ ജെ.എസ്. നിവേദ്യ 2:18.62 സ്വര്ണം നേടി. കോഴിക്കോട് ബാലുശ്ശേരി സ്വദേശിനിയായ നിവേദ്യ പ്ലസ് ടു വിദ്യാര്ഥിനിയാണ്. കോതമംഗലം മാര്ബേസില് എച്ച്എസ്സിലെ സി.ആര്. നിത്യ 2 മിനിറ്റ് 22.92 സെക്കന്ഡില് വെള്ളിയും ഇടുക്കി കട്ടപ്പന ജിടിഎച്ച്എസിലെ ജോബിന ജോബി 2 മിനിറ്റ് 24.09 സെക്കന്ഡില് വെങ്കലവും സ്വന്തമാക്കി.
