തിരുവനന്തപുരം: തിരുവനന്തപുരത്തെ ആര്‍മി റിക്രൂട്ടിങ് ഓഫീസ് സംഘടിപ്പിക്കുന്ന അഗ്‌നിവീര്‍ റിക്രൂട്ട്‌മെന്റ് റാലി നാളെ രാവിലെ ആറിന് അടൂര്‍ സബ് ഡിവിഷനിലെ കൊടുമണ്‍ ഇഎംഎസ് സ്‌റ്റേഡിയത്തില്‍ ആരംഭിക്കും. നവംബര്‍ 13ന് റാലി അവസാനിക്കും. ഓണ്‍ലൈന്‍ പൊതു പ്രവേശന പരീക്ഷയില്‍ കേരളത്തില്‍ നിന്നുള്ള അഗ്‌നിവീര്‍ വിഭാഗവും കേരള, കര്‍ണാടക, കേന്ദ്രഭരണ പ്രദേശങ്ങളായ ലക്ഷദ്വീപ്, മാഹി എന്നിവിടങ്ങളില്‍ നിന്നുള്ള റെഗുലര്‍ വിഭാഗത്തില്‍ യോഗ്യത നേടിയ പുരുഷ അപേക്ഷകര്‍ക്കുമായാണ് റാലി.
അഗ്‌നിവീര്‍ ജനറല്‍ ഡ്യൂട്ടി, ടെക്‌നിക്കല്‍, ക്ലര്‍ക്ക്/സ്‌റ്റോര്‍ കീപ്പര്‍ ടെക്‌നിക്കല്‍, ട്രേഡ്‌സ്‌മെന്‍ എന്നീ വിഭാഗങ്ങളിലേക്കുള്ള റാലിയില്‍ തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം എന്നീ ജില്ലകളിലെ ഷോര്‍ട്ട്‌ലിസ്റ്റ് ചെയ്യപ്പെട്ട ഉദ്യോഗാര്‍ത്ഥികളും, കേരള, കര്‍ണാടക, ലക്ഷദ്വീപ്, മാഹി എന്നിവിടങ്ങളിലെ ഷോര്‍ട്ട്‌ലിസ്റ്റ് ചെയ്യപ്പെട്ട സോള്‍ജിയര്‍ നഴ്‌സിങ് അസിസ്റ്റന്റ്/നേഴ്‌സിങ് അസിസ്റ്റന്റ് വെറ്ററിനറി, ശിപായി ഫാര്‍മ, ആര്‍ടി ജെസിഒ (റിലീജിയസ് ടീച്ചേഴ്‌സ് ജൂനിയര്‍ കമ്മീഷന്‍ഡ് ഓഫീസര്‍), ഹവില്‍ദാര്‍ സര്‍വേയര്‍ ഓട്ടോ കാര്‍ട്ടോ എന്നീ വിഭാഗങ്ങളിലെ ഉദേ്യാഗാര്‍ത്ഥികളുമാണ് പങ്കെടുക്കുന്നത്.
