മലപ്പുറം:റേഷന് കടയില് അതിക്രമിച്ചു കയറി കടയുടമയെ ദേഹോപദ്രവമേല്പ്പിക്കുകയും റേഷന് സാധനങ്ങള് കവര്ച്ച ചെയ്യുകയും ചെയ്ത കേസിലെ പ്രതി പിടിയില്.മിനി എസ്റ്റേറ്റ് പാലംകുളങ്ങര ഹരീഷ് (46) ആണ് അറസ്റ്റിലായത്. കൊണ്ടോട്ടി പള്ളിക്കല് ബസാര് ചാലക്കല്പുരായി മിനി എസ്റ്റേറ്റിലെ റേഷന് കടയിലാണ് അതിക്രമം നടത്തിയത്.
ഞായറാഴ്ച രാവിലെയാണ് കേസിനാധാരമായ സംഭവം നടന്നത്.റേഷന് കാര്ഡ് പ്രകാരം അനുവദിച്ചിച്ചിട്ടുളള ഭക്ഷ്യ സാധനങ്ങള് വാങ്ങിയ ശേഷവും കടയിലെത്തി ഹരീഷ് കൂടുതല് അരിയും സാധനങ്ങളും ആവശ്യപ്പെട്ടത് കടയുടമ ചോലക്കല് ഫാസില് അംഗീകരിച്ചില്ല. ഇതോടെ കടയില് അതിക്രമിച്ചു കയറി ഫാസിലിനെ ദേഹോപദ്രവമേല്പ്പിച്ച് 20 കിലോഗ്രാം അരിയും ആറ് പാക്കറ്റ് ആട്ടയും ഹരീഷ് അപഹരിക്കുകയായിരുന്നു.
നിരവധി കേസുകളിലുള്പ്പെട്ടയാളാണ് ഹരീഷ് .രണ്ട് വര്ഷം മുമ്പ് പരാതി അന്വേഷിക്കാനെത്തിയ എസ്.ഐയെ കുത്തിപ്പരിക്കേല്പ്പിച്ച കേസിലും ഇയാള് പ്രതിയാണ്.
സംഭവത്തിന് ശേഷം ഒളിവില് പോയ പ്രതി വീട്ടിലെത്തിയിട്ടുണ്ടെന്ന വിവരം കിട്ടിയതിന്റെ അടിസ്ഥാനത്തില് പൊലീസ് സംഘം എത്തിയപ്പോള് ഇയാള് രക്ഷപ്പെടാന് ശ്രമിച്ചെങ്കിലും ഓടിച്ചിട്ട പിടികൂടുകയായിരുന്നു. കോടതി പ്രതിയെ 14 ദിവസത്തേക്ക് റിമാന്ഡ് ചെയ്തു. ഇയാള്ക്കെതിരെ കാപ്പ നിയമപ്രകാരം നടപടികള് സ്വീകരിക്കുമെന്ന് പൊലീസ് അറിയിച്ചു.
