കണ്ണൂര്‍: കണ്ണൂര്‍ ജില്ലാ കളക്ടര്‍ അരുണ്‍ കെ. വിജയന് ഐഎഎസ് എടുത്തത് ഐഎഎസ് അക്കാദമിയില്‍ നിന്നല്ല ഇഎംഎസ് അക്കാദമിയില്‍ നിന്നാണോ എന്ന് ബിജെപി ദേശീയ ഉപാധ്യക്ഷന്‍ എ.പി. അബ്ദുള്ളക്കുട്ടി. കണ്ണൂര്‍ എഡിഎം ആയിരുന്ന കെ. നവീന്‍ ബാബുവിന്റെ ദുരൂഹമരണത്തില്‍ ജുഡീഷ്യല്‍ അന്വേഷണമാവശ്യപ്പെട്ട് കളക്ടറുടെ ഔദ്യോഗിക വസതിക്ക് മുന്നില്‍ യുവമോര്‍ച്ച സംഘടിപ്പിച്ച ദീപം തെളിയിക്കല്‍ പരിപാടി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
പി.പി. ദിവ്യയെ പോലീസ് അറസ്റ്റ് ചെയ്ത് ജയിലിലടച്ചത് പ്രതിപക്ഷത്തിന്റെയും മാധ്യമങ്ങളുടെയും പ്രതിഷേധത്തില്‍ ഗത്യന്തരമില്ലാതെയാണ്. ഇപ്പോള്‍ ദിവ്യയെ സംരക്ഷിക്കാന്‍ കളക്ടര്‍ അരുണ്‍ കെ. വിജയന് രംഗത്തിറങ്ങിയിരിക്കുകയാണ്. എന്നാല്‍ കളക്ടറല്ല പിണറായി വിജയന് വിചാരിച്ചാലും ദിവ്യയെ സംരക്ഷിക്കാന്‍ സാധ്യമല്ല. ഇപ്പോള്‍ പോലീസിന് മുന്നില്‍ കള്ളസാക്ഷി പറയുന്ന കളക്ടറുടെ പങ്ക് തുടക്കത്തില്‍ത്തന്നെ എല്ലാവര്‍ക്കും ബോധ്യപ്പെട്ടതാണ്. ദിവ്യയുടെ സംരക്ഷണത്തിന് എം.വി. ജയരാജനുമായി ഗൂഢാലോചന നടത്തി. എന്നാല്‍ ജനാധിപത്യക്രമത്തില്‍ കളക്ടര്‍ രക്ഷപ്പെടാന്‍ പോകുന്നില്ലെന്നും അദ്ദേഹം പറഞ്ഞു. യുവമോര്‍ച്ച ജില്ലാ പ്രസിഡന്റ് അരുണ്‍ കെ. ഭരത് അധ്യക്ഷത വഹിച്ചു.
