കോട്ടയം: പ്രശസ്ത ഭാഷാ പണ്ഡിതനും എഴുത്തുകാരനുമായ കോട്ടയം മങ്ങാനം കൈപ്പള്ളി ഇല്ലത്ത് (കൈപ്പള്ളി ഇല്ലം പെരുമ്പാവൂര്) ഡോ. (പ്രൊഫ.) കെ. കേശവന് നമ്പൂതിരി (76) ന്യൂയോര്ക്കിനടുത്ത് ലിവര്പൂളില് മകന്റെ വസതിയില് അന്തരിച്ചു.
പ്രശസ്ത വിഷ വൈദ്യനായിരുന്ന കൈപ്പള്ളി കേശവന് നമ്പൂതിരിയുടെയും ആര്യാ അന്തര്ജനത്തിന്റെയും മകനാണ്. ഐരാപുരം ശ്രീശങ്കര വിദ്യാപീഠം കോളജില് മലയാള വിഭാഗം മേധാവിയായിരുന്നു. സംസ്കൃതത്തിലും മലയാളത്തിലുമായി ഒട്ടേറെ സ്തോത്ര കൃതികളും നാടകങ്ങളും എഴുതിയിട്ടുണ്ട്. ശങ്കരാചാര്യ സ്വാമികളുടെ ജീവിതത്തെ അധീകരിച്ചെഴുതിയ സര്വജ്ഞ ശങ്കരം എന്ന നാടകം കാഞ്ചി കാമകോടി പീഠം അംഗീകരിച്ച് ആദരിച്ചിട്ടുണ്ട്.
പ്രശസ്ത സംഗീത സംവിധായകന് പെരുമ്പാവൂര് ജി. രവീന്ദ്രനാഥുമായി ചേര്ന്ന് മുത്തുസ്വാമി ദീക്ഷിതരുടെ കൃതികള്ക്ക് വ്യാഖ്യാനമെഴുതി. സംസ്കൃതത്തില് നരസിംഹമൂര്ത്തി സഹസ്രനാമം എഴുതിയിട്ടുണ്ട്. ആര്യഗീതി, അമൃതഗീതി എന്നിവ സോപാനത്ത് പാടുന്നതിനായി എഴുതിയ ദശാവാതാര കീര്ത്തനം ഉള്പ്പെടെയുള്ള കൃതികളുടെ സമാഹാരമാണ്.
ഭാര്യ: കോട്ടയം ചോഴിയത്തില്ലത്ത് സി.പി. ലതാകുമാരി (റിട്ട. സൗത്ത് ഇന്ത്യന് ബാങ്ക്). മക്കള്: കെ. ഇന്ദു (എന്ജിനീയര്, ഖത്തര്), കെ. സുദീപ് (ആമസോണ്, യുഎസ്എ). മരുമക്കള്: പ്രിജിത്ത് ഹരിഹരന് (എന്ജിനീയര്, ഖത്തര്), ശ്രീദേവി (എന്ജിനീയര് യുഎസ്എ). സംസ്കാരം പിന്നീട്.
