തിരുവനന്തപുരം: സംസ്ഥാനത്തെ മലയോര പ്രദേശങ്ങളില് ഒറ്റപ്പെട്ട ഇടങ്ങളില് കനത്ത മഴയ്ക്ക് സാധ്യതയെന്ന് കാലാവസ്ഥാ മുന്നറിയിപ്പ്. തെക്കന് മധ്യ കേരളത്തില് മഴ തുടരും. പത്ത് ജില്ലകളില് യെല്ലോ അലര്ട്ട് പുറപ്പെടുവിച്ചു.
വിതുര ബോണക്കാട് റോഡില് മണ്ണിടിച്ചിലിനെ തുടര്ന്ന് റോഡ് അടച്ചു. ഗണപതിപാറയിലാണ ബുധനാഴ്ച വൈകിട്ട പെയ്ത ശക്തമായ മഴയില് മണ്ണിടിച്ചില് ഉണ്ടായത്. നാളെ രാവിലെ മണ്ണ് മാറ്റി ഗതാഗതം പുന:സ്ഥാപിക്കുമെന്ന് അധികൃതര് അറിയിച്ചു. വാമനപുരം നദിയില് ജനനിരപ്പ് ഉയര്ന്നു.
ഇടുക്കിയിലും കൊല്ലത്തും മലയോര മേഖലകളില് ശക്തമായ മഴ തുടരുന്നു. ഇടുക്കി വണ്ണപ്പുറത്തിനടുത്ത് ചീങ്കല് സിറ്റിയില് വണ്ണപ്പുറം സ്വദേശികളായ ദിവാകരന്, ഭാര്യ ഓമന എന്നിവര് തോട്ടില് അകപ്പെട്ടു. ഏറെ നേരം നീണ്ടുനിന്ന തെരച്ചിലിനൊടുവില് ഭാര്യ ഓമനയുടെ മൃതദേഹം കണ്ടെത്തി. ദിവാകരനെ രക്ഷപ്പെടുത്തി. അപകടത്തില് പെട്ട രണ്ടുപേരും തൊഴിലുറപ്പ് തൊഴിലാളികളാണ്.
കൊല്ലത്തിന്റെ കിഴക്കന് മലയോര മേഖലയില് പെയ്ത ശക്തമായ മഴയില് പലയിടങ്ങളിലും മലവെള്ളപ്പാച്ചില് ഉണ്ടായി. തെന്മല, ഇടപ്പാളയം, കഴുതുരുട്ടി മേഖലകളില് മണിക്കൂറുകള് തുടര്ച്ചയായി മഴ പെയ്തു. തെന്മല മാര്ക്കറ്റ് റോഡില് വെള്ളം കയറി. ഇടപ്പാളയം അരുണോദയം കോളനിയില് തോട് കരകവിഞ്ഞു.
