കൊച്ചി: വിചാരണക്കിടെ പരാതിക്കാരന്‍ കൂറുമാറിയിട്ടുംകൈക്കൂലിക്കേസില്‍ മുന്‍ ആര്‍ഡിഒയെ ശിക്ഷിച്ച് വിജിലന്‍സ് കോടതി. സംരക്ഷണ ഭിത്തി പുനര്‍ നിര്‍മിക്കാന്‍ 50000 രൂപ കൈക്കൂലി വാങ്ങിയ കേസിലാണ് മൂവാറ്റുപുഴ ആര്‍ഡിഒ ആയിരുന്ന കാഞ്ഞിരപ്പള്ളി സ്വദേശി വി ആര്‍ മോഹനന്‍ പിള്ളയ്‌ക്ക് (63) 7 വര്‍ഷം കഠിനതടവും 35000 രൂപ പിഴയും വിധിച്ചത്. 2016 ല്‍ വാഴക്കുളത്ത് ഇടിഞ്ഞുവീഴാറായ സംരക്ഷണ ഭിത്തി നിര്‍മ്മിക്കുന്നതിനുള്ള അനുവാദം നല്‍കാന്‍ വീട്ടൂര്‍ വരിക്‌ളായില്‍ മാത്യു വി ഡാനിയലിനോടാണ് മോഹനന്‍ പിള്ള കൈക്കൂലി വാങ്ങിയത്. വിജിലന്‍സ് ഇത് കൈയോടെ പിടികൂടി. വിജലന്‍സ് ഡിവൈഎസ്പി എം. എന്‍ രമേശ് ആണ് അന്വേഷണം നടത്തി കുറ്റപത്രം സമര്‍പ്പിച്ചത്. മോഹനന്‍ പിള്ളക്കെതിരെ പരാതി നല്‍കിയയാള്‍ വിചാരണയ്‌ക്കിടെ കൂറുമാറിയിരുന്നു.
മറ്റൊരു കൈക്കൂലിക്കേസില്‍ പാങ്ങോട് മുന്‍ വില്ലേജ് ഓഫീസര്‍ സജിത്ത് എസ് നായര്‍ക്കും ഏഴുവര്‍ഷം കഠിനതടവു ശിക്ഷ ലഭിച്ചു. തിരുവനന്തപുരം വിജിലന്‍സ് കോടതിയുടേതാണ് വിധി. പോക്കുവരവു ചെയ്തു കൊടുക്കാന്‍1500 രൂപ വാങ്ങിയ കേസിലാണ് ഇത് .
