ഉടുമ്പ് കേസില്‍ ‘സെറ്റില്‍മെന്റ്’ വാഗ്ദാനം; ഒരു ലക്ഷം കൈക്കൂലി വാങ്ങിയ ഫോറസ്റ്റ് ഉദ്യോഗസ്ഥര്‍ പിടിയില്‍

തൃക്കാക്കര/പെരുമ്പാവൂര്‍: റെസ്റ്റോറന്റുമായി ബന്ധപ്പെട്ട് ഉടുമ്പിനെ കൊന്ന കേസില്‍ ഭീഷണിപ്പെടുത്തിയും കേസ് ഒഴിവാക്കാമെന്ന് വാഗ്ദാനം നല്‍കിയും ഒരു ലക്ഷം രൂപ കൈക്കൂലി വാങ്ങിയ രണ്ട് വനം വകുപ്പ് ഉദ്യോഗസ്ഥരെ വിജിലന്‍സ് പിടികൂടി. എറണാകുളം മേക്കപ്പാല ഫോറസ്റ്റ് സ്റ്റേഷനിലെ സെക്ഷന്‍ ഫോറസ്റ്റ് ഓഫീസര്‍ പിറവം സ്വദേശി ജിമ്മി സ്‌കറിയ, ഡെ. റേഞ്ച് ഓഫീസര്‍ ആലപ്പുഴ പാതിരപ്പള്ളി സ്വദേശി ശ്രീജിത് സി.പി. എന്നിവരാണ് അറസ്റ്റിലായത്. മൂവാറ്റുപുഴ വിജിലന്‍സ് കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.

കാക്കനാട്ടെ റെസ്റ്റോറന്റില്‍ മാനേജരായി ജോലി ചെയ്യുന്ന കാസര്‍കോട് സ്വദേശി നല്‍കിയ പരാതിയിലാണ് വിജിലന്‍സ് നടപടി. റെസ്റ്റോറന്റിലെ രണ്ട് ജീവനക്കാരെ ഉടുമ്പിനെ കൊന്ന കേസില്‍ ഏപ്രില്‍ 16ന് അറസ്റ്റ് ചെയ്ത് റിമാന്‍ഡിലാക്കിയിരുന്നു. പിന്നീട് ജാമ്യത്തില്‍ പുറത്തിറങ്ങിയ ഇവരോട് എല്ലാ ബുധനാഴ്ചയും മേക്കപ്പാല ഫോറസ്റ്റ് സ്റ്റേഷനില്‍ ഹാജരായി ഒപ്പിടണമെന്ന് കോടതി നിര്‍ദേശിച്ചിരുന്നു. ഇതിനിടെ, കഴിഞ്ഞ 6ന് സ്റ്റേഷനില്‍ ഒപ്പിടാനെത്തിയ ജീവനക്കാരോട് കൂടുതല്‍ പേരെ പ്രതിചേര്‍ക്കുമെന്നും പണം നല്‍കി സെറ്റില്‍ ചെയ്തില്ലെങ്കില്‍ റെസ്റ്റോറന്റിലെ മറ്റു മൂന്ന് ജീവനക്കാരെയും അറസ്റ്റ് ചെയ്യുമെന്നും ഉദ്യോഗസ്ഥര്‍ ഭീഷണിപ്പെടുത്തി.

പിന്നാലെ ഡെ. റേഞ്ച് ഓഫീസര്‍ ശ്രീജിത്തും സെക്ഷന്‍ ഫോറസ്റ്റ് ഓഫീസര്‍ ജിമ്മി സ്‌കറിയയും മറ്റ് ചില ഉദ്യോഗസ്ഥരുമായി റെസ്റ്റോറന്റിലെത്തി സിസിടിവി ദൃശ്യങ്ങള്‍ പരിശോധിക്കുകയും എല്ലാവരെയും അറസ്റ്റ് ചെയ്യുമെന്ന് ഭീഷണി മുഴക്കുകയും ചെയ്തു. തുടര്‍ന്ന് പരാതിക്കാരനെയും മറ്റ് രണ്ട് ജീവനക്കാരെയും സ്റ്റേഷനില്‍ വിളിച്ചുവരുത്തി മൊഴി രേഖപ്പെടുത്തിയ ശേഷമാണ് കൈക്കൂലി ആവശ്യപ്പെട്ടതെന്ന് വിജിലന്‍സ് അറിയിച്ചു.

കേസ് ഒഴിവാക്കണമെങ്കില്‍ മുകളിലും താഴെയുമുള്ള ഉദ്യോഗസ്ഥര്‍ക്കെല്ലാം വിഹിതം നല്‍കണം എന്ന പേരില്‍ പണം ആവശ്യപ്പെട്ടതായും പരാതിയില്‍ പറയുന്നു. മേയ് 13ന് ഡെ. റേഞ്ച് ഓഫീസര്‍ ശ്രീജിത് ഫോണിലൂടെ ഒരു ലക്ഷം ആവശ്യപ്പെട്ടതോടെയാണ് പരാതിക്കാരന്‍ വിജിലന്‍സിനെ സമീപിച്ചത്.

പരാതിയുടെ അടിസ്ഥാനത്തില്‍ എറണാകുളം വിജിലന്‍സ് യൂണിറ്റ് ഡിവൈഎസ്പിയുടെ നേതൃത്വത്തില്‍ സംഘം കെണിയൊരുക്കി നിരീക്ഷണം ശക്തമാക്കി. വ്യാഴാഴ്ച രാത്രി 9.45ഓടെ കുറുപ്പുംപടി എംജിഎം സ്‌കൂളിന് സമീപത്ത് വച്ച് പരാതിക്കാരനില്‍ നിന്ന് പണം കൈപ്പറ്റുന്നതിനിടെയാണ് ജിമ്മി സ്‌കറിയയെ വിജിലന്‍സ് സംഘം പിടികൂടിയത്. തുടര്‍ന്ന് സമീപത്തുണ്ടായിരുന്ന ശ്രീജിത്തിനെയും മുടിക്കല്‍ ഫോറസ്റ്റ് തടി ഡിപ്പോയ്‌ക്ക് സമീപത്ത് നിന്ന് പിടികൂടി.