മുംബൈ ; എൻസിപി നേതാവും മഹാരാഷ്ട്ര മുൻ മന്ത്രിയുമായ ബാബ സിദ്ദിഖി കൊല്ലപ്പെട്ടതിന് പിന്നാലെ നടൻ സൽമാൻ ഖാന് സുരക്ഷ ശക്തമാക്കി മുംബൈ പോലീസ്. സൽമാൻ ഖാന്റെ അടുത്ത സുഹൃത്താണ് ബാബ സിദ്ദിഖി. ലോറൻസ് ബിഷ്ണോയിയാണ് കൊലപാതകത്തിന് പിന്നിലെന്നാണ് സൂചന. സുഹൃത്തിന്റെ മരണവാർത്ത വന്നതിനു പിന്നാലെ സൽമാൻ ഖാൻ ബിഗ് ബോസ് റിയാലിറ്റി ഷോ വിട്ടു. ഇനി ആരെയും പ്രത്യേകിച്ച് കാണില്ലെന്ന് തീരുമാനിച്ചതായും വാർത്തയുണ്ട്.
അതേസമയം സൽമാൻ മാപ്പ് പറയണമെന്നും , ശിക്ഷ പിന്നെ തീരുമാനിക്കുമെന്നുമാണ് ബിഷ്ണോയ് സംഘം പറയുന്നത് . ‘ സൽമാൻ ഖാൻ മാപ്പ് പറഞ്ഞാൽ ബിഷ്ണോയി സമൂഹം അത് പരിഗണിക്കും. സോമി അലി തെറ്റൊന്നും ചെയ്തിട്ടില്ല. അതിനാൽ അവളുടെ ക്ഷമാപണം അംഗീകരിക്കാനാവില്ല. സൽമാൻ ക്ഷേത്രത്തിൽ വരണം. അതിനു ശേഷം അയാൾ സ്വയം മാപ്പ് പറയണം. അതിന് ശേഷം എന്ത് ശിക്ഷയാണ് നൽകേണ്ടതെന്ന് ആലോചിക്കാം-ബിഷ്ണോയ് കമ്മ്യൂണിറ്റിയുടെ അഖിലേന്ത്യാ പ്രസിഡൻ്റ് ദേവേന്ദ്ര ബുധിയ പറഞ്ഞു.
കൃഷ്ണമാനുകളെ വേട്ടയാടിയ കേസിൽ സൽമാൻ ഖാന്റെ മുൻ കാമുകി സോമി അലി സൽമാൻ ഖാന് വേണ്ടി മാപ്പ് പറഞ്ഞിരുന്നു. എന്നാൽ അത് പരിഗണിക്കില്ലെന്നാണ് ബിഷ്ണോയ് വിഭാഗം പറയുന്നത്.
