ന്യൂഡല്ഹി: കേന്ദ്ര ആയുഷ് മന്ത്രാലയത്തിന്റെയും എന്സിഐഎസ്എമ്മിന്റെയും പേരും ലോഗോയും അനധികൃതമായി ഉപയോഗിക്കുന്ന സംഘടനകള്ക്കും സ്ഥാപനങ്ങള്ക്കുമെതിരെ കര്ക്കശ നടപടിയെടുക്കുമെന്ന് മുന്നറിയിപ്പ്. വിവിധ സംഘടനകള് നടത്തുന്ന പരിശീലന പരിപാടികള്, സെമിനാറുകള്, ശില്പ്പശാലകള് എന്നിവയിലും എന്.ജി.ഒ സംഘടനകള്, ആയുര്വേദ / യോഗയുമായി ബന്ധപ്പെട്ട് നടത്തുന്ന ചില ഹ്രസ്വകാല കോഴ്സുകള്ക്ക് അധികാരികത വരുത്തുന്നതിനും ഇത്തരം ലോഗോ വ്യാപകമായി ഉപയോഗിച്ചുവരുന്നുണ്ട്. ആയുഷ് മന്ത്രാലയം, എന്സിഐഎസ്എം എന്നിവ നേരിട്ട് നല്കുന്നതോ, ഔദ്യോഗികമായി അംഗീകരിച്ചതോ ആയ സര്ട്ടിഫിക്കേഷന്സ് മാത്രമാണ് സാധുവായവ. ഇത്തരത്തില് വഞ്ചനാപരമായി ലോഗോ ഉപയോഗിക്കുന്ന സംഭവങ്ങള് ശ്രദ്ധയില്പ്പെടുന്ന പക്ഷം പ്രസ്തുത വ്യക്തികള്ക്കെതിരെയും സംഘടനകള്ക്കെതിരെയും 2023 ലെ എന്സിഐഎസ്എം റഗുലേഷനിലെ റഗുലേഷന് 27 സബ് റഗുലേഷന് (ഡി) പ്രകാരവും, ഭാരതീയ ന്യായ സംഹിത പ്രകാരവും കടുത്ത ശിക്ഷാനടപടി സ്വീകരിക്കുമെന്ന് ഇന്ത്യന് സിസ്റ്റം ഓഫ് മെഡിസിന് പത്രകുറിപ്പില് അറിയിച്ചു.
