വിവാഹം കഴിഞ്ഞ് രണ്ടര വര്ഷം പിന്നിട്ടതോടെ നയന്താരയുടെയും വിഘ്നേശ് ശിവന്റെയും വിവാഹവീഡിയോ പുറത്തു വിടാനൊരുങ്ങി നെറ്റ്ഫ്ളിക്സ്. 2022 ജൂണില് ആയിരുന്നു നയന്താരയും വിഘ്നേശ് ശിവനും വിവാഹിതരായത്. സൂപ്പര്സ്റ്റാറുകളായ രജനികാന്ത്, ഷാരൂഖ് ഖാന്, വിജയ് സേതുപതി എന്നിവരടക്കം വന്താരനിരയായിരുന്നു വിവാഹത്തില് പങ്കെടുത്തത്.
വിവാഹദൃശ്യങ്ങള് ഒ.ടി.ടിയില് ഡോക്യുമെന്ററിയായി സ്ട്രീം ചെയ്യുമെന്നാണ് വിവരം. നയന്താര: ബിയോണ്ട് ദ ഫെയറി ടെയില് എന്ന പേരിലായിരിക്കും ഡോക്യുമെന്ററി എന്ന് ടീസര് പുറത്തുവിട്ട് നെറ്റ്ഫ്ളിക്സ് പ്രഖ്യാപിച്ചിരുന്നു. എന്നാല് ഈ വീഡിയോയുടെ റിലീസ് വൈകുകായിരുന്നു.
ഈ വീഡിയോ 25 കോടി രൂപയ്ക്കാണ് നയന്താര നെറ്റ്ഫ്ളിക്സിന് വിറ്റതെന്നും റിപ്പോര്ട്ടുകളുണ്ട്. ഒരു മണിക്കൂറും 21 മിനിറ്റുമായിരിക്കും വിവാഹ ഡോക്യുമെന്ററിയുടെ ദൈര്ഘ്യം. റിലീസ് തീയതി ഇതുവരെ പ്രഖ്യാപിച്ചിട്ടില്ല.
നയന്താരയുടെയും വിഘ്നേശ് ശിവന്റെയും പ്രണയയാത്രയും ഇരുവരുടെയും ജീവിതയാത്രയും വിവാഹത്തിന്റെ ബിഹൈന്ഡ് ദി സീന്സും ഉള്പ്പെടെ വീഡിയോയില് ഉണ്ടാവും. അതേസമയം, വാടകഗര്ഭപാത്രത്തിലൂടെ ദമ്പതിമാര്ക്ക് ഇരട്ടക്കുട്ടികള് ജനിച്ചിരുന്നു. 2022ല് ആണ് കുടുംബത്തിലേക്ക് പുതിയ അതിഥികള് എത്തിയത്.
മക്കളായ ഉയിരിനും ഉലകിനുമൊപ്പമുള്ള ചിത്രങ്ങള് ഇരുവരും സോഷ്യല് മീഡിയയില് പങ്കുവയ്ക്കാറുണ്ട്. ‘മണ്ണാങ്കട്ടി സിന്സ് 1960’ എന്ന ചിത്രമാണ് നയന്താരയുടെതായി അണിയറയില് ഒരുങ്ങി കൊണ്ടിരിക്കുന്നത്. ‘ടെസ്റ്റ്’ എന്ന ചിത്രമാണ് നടിയുടെതായി റിലീസിന് ഒരുങ്ങുന്നത്. ചിത്രം ഡയറക്ട് ഒ.ടി.ടി റിലീസ് ആയിരിക്കും.
