ആലപ്പുഴ: സ്‌പോട്ട്ബുക്കിങ്ങ് ഉപേക്ഷിക്കാനുള്ള തീരുമാനം പിന്‍വലിച്ച് എല്ലാ ഭക്തര്‍ക്കും സുഗമമായ ദര്‍ശനത്തിനുള്ള സൗകര്യം ഒരുക്കാന്‍ സര്‍ക്കാര്‍ തയാറാകണമെന്ന് ബിഡിജെഎസ് സംസ്ഥാന കൗണ്‍സില്‍ ആവശ്യപ്പെട്ടു. 25 ശതമാനമെങ്കിലും ഭക്തര്‍ക്ക് സ്‌പോട്ട്ബുക്ക് ചെയ്ത് ദര്‍ശനം നടത്തുന്നതിനുള്ള സൗകര്യം ഏര്‍പ്പെടുത്തണം. ശബരിമല തീര്‍ത്ഥാടനത്തെ തകര്‍ക്കുക എന്ന ലക്ഷ്യം വച്ച് മാത്രം കുറെ വര്‍ഷങ്ങളായി ശബരിമലയെ വിവാദങ്ങളില്‍പ്പെടുത്തി തീര്‍ത്ഥാടകരെ ബുദ്ധിമുട്ടിക്കുന്ന രീതി ദേവസ്വം ബോര്‍ഡ് തുടരുന്നത് ആശങ്ക ഉളവാക്കുന്നതാണ്.
ബിഡിജെഎസ് സംസ്ഥാന എക്‌സിക്യൂട്ടീവ് യോഗവും ഇതിനെ ശക്തമായി അപലപിച്ചു. സര്‍ക്കാര്‍ തീരുമാനം പിന്‍വലിക്കണം എന്നാവശ്യപ്പെട്ട് ബിഡിജെഎസ് തിരുവനന്തപുരം ജില്ലാ കമ്മിറ്റിയുടെ നേതൃത്വത്തില്‍ സെക്രട്ടേറിയേറ്റ് പടിക്കല്‍ ധര്‍ണ നടത്താനും തീരുമാനിച്ചു.
സംസ്ഥാന അദ്ധ്യക്ഷന്‍ തുഷാര്‍ വെള്ളാപ്പള്ളി യോഗം ഉദ്ഘാടനം ചെയ്തു. വരുന്ന ഉപതെരഞ്ഞെടുപ്പിലും ത്രിതല പഞ്ചായത്ത് തെരഞ്ഞെടുപ്പിലും മുന്നണിയുടെ പ്രവര്‍ത്തനങ്ങള്‍ കൂടുതല്‍ ശക്തിപ്പെടുത്തുന്നതിന്റെ ഭാഗമായി വിപുലമായ സംഘടനാ പ്രവര്‍ത്തനങ്ങള്‍ക്കാണ് രൂപം നല്‍കിയത്. സംസ്ഥാനത്ത് ഇന്ന് എല്ലാ ഘടകങ്ങളും എന്‍ഡിഎ മുന്നണിക്ക് അനുകൂലമാണ്, പാലക്കാട് ഉള്‍പ്പെടെ വലിയ വിജയം ഉണ്ടാകുമെന്നും യോഗം വിലയിരുത്തി.
സംസ്ഥാന ഉപാദ്ധ്യക്ഷന്‍ കെ. പത്മകുമാര്‍ അദ്ധ്യക്ഷനായി. സോമശേഖരന്‍ നായര്‍, പൈലി വാത്യാട്ട്, അഡ്വ. സിനില്‍ മുണ്ടപ്പള്ളില്‍, അഡ്വ. പി.എസ്. ജ്യോതിസ്, അനിരുദ്ധ് കാര്‍ത്തികേയന്‍, പച്ചയില്‍ സന്ദീപ്, രാജേഷ് നെടുമങ്ങാട്, ഡി. പ്രേംരാജ്, എ.ബി. ജയപ്രകാശ്, ഷീബ ടീച്ചര്‍, അനീഷ് പുല്ലുവേലില്‍ എന്നിവര്‍ സംസാരിച്ചു. ജില്ലാ പ്രസിഡന്റുമാരായ ഗിരി പാമ്പനാല്‍, അജി ഇരിട്ടി, അതുല്യഘോഷ്, എം.പി. സെന്‍, ശ്രീകുമാര്‍ തട്ടാരത്ത്, അഡ്വ. പ്രതീഷ് പ്രഭാ, ഡോ. ആനന്ദരാജ്, പരുത്തിപ്പള്ളി സുരേന്ദ്രന്‍, അഡ്വ. രഘു, ഗണേഷ് പാറക്കട്ടേല്‍ എന്നിവര്‍ സംസാരിച്ചു. സംസ്ഥാന വൈസ് പ്രസിഡന്റ് എ.എന്‍. അനുരാഗ് സ്വാഗതവും അഡ്വ. സംഗീത വിശ്വനാഥന്‍ നന്ദിയും പറഞ്ഞു.
