ന്യൂദൽഹി: ഹരിയാനയിലെ ഹാട്രിക് ജയത്തിനും പിന്നാലെ സർക്കാർ രൂപീകരണ ചർച്ചകൾ തുടങ്ങി ബിജെപി. മുന്‍ ഹരിയാന മുഖ്യമന്ത്രി മനോഹര്‍ ലാല്‍ ഖട്ടറിന്റെ വസതിയില്‍ കേന്ദ്ര മന്ത്രിയും ഹരിയാനയുടെ ചാര്‍ജുള്ള നേതാവുമായ ധര്‍മേന്ദ്ര പ്രധാനുമായി കൂടിക്കാഴ്ച നടത്തുകയാണ്. തിരഞ്ഞെടുപ്പ് ചുമതലയുള്ള നേതാക്കളും ഖട്ടറുടെ വസതിയിലെത്തിയിട്ടുണ്ട്.
ഹാട്രിക്ക് ജയത്തിനു പിന്നാലെ പ്രധാനമന്ത്രി നരേന്ദ്ര മോദി ബിജെപി പ്രവര്‍ത്തകരെ അഭിസംബോധന ചെയ്യും. വൈകുന്നേരം ഏഴിന് ബിജെപി ആസ്ഥാനത്ത് പ്രധാനമന്ത്രി എത്തി വിജയാഘോഷത്തില്‍ പങ്കെടുക്കും. 90 അംഗ നിയമസഭയില്‍ ബിജെപി 51 സീറ്റിലും കോണ്‍ഗ്രസ് 34 സീറ്റിലും മറ്റുള്ളവര്‍ അഞ്ചു സീറ്റിലും ലീഡു ചെയ്യുകയാണ്. വോട്ടെണ്ണലിന്റെ ആദ്യ മണിക്കൂറില്‍ ബഹുദൂരം മുന്നിലായിരുന്ന കോണ്‍ഗ്രസ് പിന്നീട് ചീട്ടു കൊട്ടാരം പോലെ തകരുകയായിരുന്നു.
കേവല ഭൂരിപക്ഷം മറികടന്ന് ബിജെപി മുന്നേറ്റം തുടരുന്നതിനിടെ ജനറല്‍ സെക്രട്ടറിമാരുടെ അടിയന്തരയോഗം ബിജെപി ദേശീയ അധ്യക്ഷന്‍ ജെ.പി.നദ്ദ വിളിച്ചു. പാര്‍ട്ടി ആസ്ഥാനത്തു ചേരുന്ന യോഗത്തില്‍ സര്‍ക്കാരിന്റെ ഭാവി പരിപാടികള്‍ ചര്‍ച്ച ചെയ്യും.
