കൊല്ലം: എഡിജിപി എം.ആര്. അജിത്കുമാര് ആര്എസ്എസ് നേതാക്കളെ കണ്ടതില് ഒരു തെറ്റുമില്ലെന്ന് എസ്എന്ഡിപിയോഗം ജനറല് സെക്രട്ടറി വെള്ളാപ്പള്ളി നടേശന്. ഇന്ത്യ ഭരിക്കുന്നവരുടെ പോഷക സംഘടനാ നേതാവിനെ എഡിജിപി കണ്ടത് മഹാപാപമായി തോന്നുന്നില്ലെന്നും അദ്ദേഹം പറഞ്ഞു. തൃശൂര് പൂരം കലക്കിയതില് ഡിജിപിയുടെ റിപ്പോര്ട്ട് എഡിജിപിക്ക് എതിരാണ്.
മുഖ്യമന്ത്രി എഡിജിപിയെ സംരക്ഷിക്കുമെന്ന് തോന്നുന്നില്ല. മുഖ്യമന്ത്രി എഡിജിപിക്കെതിരെ നടപടി എടുക്കുമെന്ന് വിശ്വസിക്കുന്നയാളാണ് താനെന്നും വെള്ളാപ്പള്ളി പറഞ്ഞു. അന്വറിന്റെ വിമര്ശനം നേരത്തെ ഒന്നും കേട്ടില്ല. ഇഷ്ടമില്ലാത്ത അച്ചി തൊട്ടതെല്ലാം കുറ്റം എന്ന രീതിയിലാണ് അന്വറിന്റെ വിമര്ശനം. മലബാറിൽ അൻവറിന് സിപിഎമ്മിനെ ഭയപ്പെടുത്താൻ സാധിക്കും. എന്തായാലും അന്വറിന് പിന്നാലെ കൂടാന് ആളുകള് ഉണ്ട്.
മലബാറിൽ ഇടതുപക്ഷത്തിനുണ്ടായ തോൽവി അവർ തന്നെ വിലയിരുത്തട്ടെ. ന്യൂനപക്ഷങ്ങള് ഇടതുപക്ഷത്തിന്റെ കൈയില് നിന്ന് പോയി എന്നത് നേരാണെന്നും വെള്ളാപ്പള്ളി കൂട്ടിച്ചേര്ത്തു.
