ബത്തേരി: റോഡില്ലാത്തതിനാല് നാല്പത്തഞ്ചുകാരിയുടെ മൃതദേഹം ആശുപത്രിയിലെത്തിക്കാന് ചുമന്നത് രണ്ട് കിലോമീറ്റര്. നെന്മേനി പഞ്ചായത്തിലെ വലിയമൂലയിലാണ് സംഭവം. കാട്ടുനായ്ക്ക വിഭാഗത്തില്പ്പെട്ട ദേവിയുടെ (45) മൃതദേഹമാണ് ഊരില് നിന്ന് വാഹനമെത്തുന്നിടത്തേക്ക് ചുമന്നുകൊണ്ടുവന്നത്.
കഴിഞ്ഞ 19നാണ് പനി ബാധിച്ച് ദേവി മരിച്ചത്. എന്നാല് ഇത് സംബന്ധിച്ച വിവരം കഴിഞ്ഞ ദിവസമാണ് പുറത്തുവന്നത്. മൃതദേഹം നാല് പേര് ചേര്ന്ന് ചുമന്നുകൊണ്ട് വലിയമൂലയിലെത്തിക്കുകയും ഇവിടെ നിന്ന് വാഹനത്തില് ആശുപത്രിയിലേക്ക് കൊണ്ടുപോകുകയുമായിരുന്നു.
സഞ്ചാരയോഗ്യമായ റോഡില്ലാത്തതിനാല് പതിറ്റാണ്ടുകളായി ഇവര് അനുഭവിക്കുന്ന ദുരിതത്തിന്റെ നേരനുഭവമാണ് ഇത്. അമ്പുകുത്തി സ്കൂളിനു സമീപത്തു നിന്നും ആരംഭിക്കുന്ന അരിപ്പറ്റക്കുന്ന് വഴി വലിയവട്ടം വരെ രണ്ട് കിലോമീറ്റര് മണ്പാതയുണ്ട്. വയലിന് നടുവിലൂടെയുള്ള ഈ പാതയും നന്നാക്കിയിട്ടില്ല. ഈ പാതയിലേക്ക് വലിയമൂല കാട്ടുനായ്ക്ക ഊരില് നിന്ന് എത്താനാണ് രണ്ട് കിലോമീറ്റര് ദൂരം കാല് നടയായി സഞ്ചരിക്കേണ്ടത്. ഈ പാതയെ ആശ്രയിച്ച് അമ്പതോളം കുടുംബങ്ങളാണുള്ളത്. 2017ല് പിഎംജിഎസ്വൈ പദ്ധതിയില് ഉള്പ്പെടുത്തി റോഡ് നവീകരിക്കാന് തുകയും വകയിരുത്തിയിരുന്നു. റോഡിന് പ്രദേശവാസികള് സ്ഥലം വിട്ടു നല്കാമെന്ന് പറഞ്ഞെങ്കിലും ഒരു നടപടിയും മുന്നോട്ട് പോയില്ല. മഴക്കാലത്ത് പാത ചെളിക്കുളം ആകുന്നതോടെ പ്രദേശത്തെ വിദ്യാര്ത്ഥികളുടെ പഠനവും മുടങ്ങും. വീട്ടിലേക്കുള്ള ആവശ്യസാധനങ്ങള് അടക്കം വളരെ ബുദ്ധിമുട്ടിയാണ് കുടുംബങ്ങള് എത്തിക്കുന്നത്.
